ޗައިނާ ސަރުކާރުން ކ. ގުރައިދޫ ކައުންސިލަށް 100 ސޯލާ މަގުބައްތި ހަދިޔާކޮށްފިއެވެ.

މި ރަސްމިއްޔާތުގައި ޗައިނާ ސަރުކާރުގެ ފަރާތުން މަގުބައްތިތައް ޙަވާލުކޮށްދެއްވީ، ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ވާންގ ލިޒިންއެވެ. އަދި ދިވެހި ސަރުކާރުގެ ފަރާތުން މި ތަކެއްޗާއި ރަމްޒީ ގޮތުން ޙަވާލުވެވަޑައިގަތީ ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރެވެ.

ޗައިނާ ސަރުކާރުގެ ފަރާތުން ހަދިޔާކުރި މި މަގުބައްތިތަކަކީ، ޗައިނާގެ ސަފީރުގެ ޚާއްސަ އިސްނެންގެވުމަކަށް އެ ރަށަށް ދެއްވި ހަދިޔާއެކެވެ. މި ރަސްމިއްޔާތުގައި ވާހަކަފުޅު ދައްކަވަމުން ސަފީރު ވާންގ ލިޒިން ވިދާޅުވީ، ރާއްޖެއާއި ޗައިނާއާއި ދެމެދު އޮތީ ޒަމާންވީ ގުޅުމެއް ކަމަށާއި، ޗައިނާއިން އަބަދުވެސް މަސައްކަތްކުރާނީ ދިވެހީންނަށް ބޭނުންވާ ލުއިފަސޭހަ ގޮތްތަކެއް ހޯދައިދިނުމަށެވެ.

މި ރަސްމިއްޔާތުގައި ވާހަކަދައްކަވަމުން ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާއިބެހޭ ވުޒާރާގެ ނައިބު، އަލްއުސްތާޛް މޫސާ ފަތުޙީ އާދަމް ވިދާޅުވީ، ދިވެހި ސަރުކާރުން އަބަދުވެސް މަސައްކަތްކުރަނީ ކައުންސިލްތަކަށް ކުރިމަތިވެފައިވާ ދަތިތަކަށް ލުއި ގޮތްތަކެއް ހޯއްދަވައިދެއްވުމަށެވެ..

ޗައިނާއިން ގުރައިދޫ ކައުންސިލަށް ހަދިޔާކުރި މަގުބައްތިތައް މިހާރު ރާއްޖެ ގެނައުމުގެ މަސައްކަތް ކުރަމުންދާ ކަމަށް ޗައިނާ އެމްބަސީން ވިދާޅުވިއެވެ. މިގޮތުން މި މަހު ފަހުކޮޅު ނުވަތަ އަންނަ ޖެނުއަރީގެ ކުރީކޮޅު މި މަގުބައްތި ޝިޕްމަންޓް ރާއްޖެއަށް އަންނާނެ ކަމަށް އެމްބަސީން ވިދާޅުވެއެވެ.