މަސްތުވާތަކެތީގެ ވިޔަފާރިން ހޯދާ ފައިސާއާއި މުދާ ދައުލަތަށް ނެގޭގޮތަށް މަސްތުވާތަކެއްޗާއިބެހޭ ޤާނޫނަށް އިސްލާހު ހުށަހަޅުއްވައިފިއެވެ. ސަރުކާރުގެ ފަރާތުން މި އިސްލާހު ރައްޔިތުންގެ މަޖިލީހަށް ހުށަހެޅުއްވީ ގަމު ދާއިރާގެ މެންބަރު ޔޫސުފް ނަޝީދުއެވެ.

މި އިސްލާހު ހުށަހެޅުއްވި ސަބަބުތަކުގެ ތެރޭގައި، ރާއްޖޭގައި މަސްތުވާތަކެތީގެ ވިޔަފާރި އިތުރުވަމުން ދިއުމާއި، މަސްތުވާތަކެތި ގެންގުޅެ ބޭނުންކުރާ މިންވަރު އިތުރުވަމުން ދިއުން ހިމެނެއެވެ. މީގެ އިތުރުން، މަސްތުވާތަކެއްޗާއި ގުޅޭ ކުށްތައް އިތުރުވަމުން ދިއުމާއި ގުޅިގެން، މި ކަންކަން ހުއްޓުވުމަށްޓަކައި ޤާނޫނު ތަންފީޛުކުރާ ފަރާތްތަކަށް ލިބިދޭ ބާރުތައް އިތުރުކުރުމަށް ވެސް މި އިސްލާހުގައި ހިމަނުއްވާފައި ވެއެވެ.

މި އިސްލާހުގެ މުހިންމު ބައެއްގެ ގޮތުގައި، މަސްތުވާތަކެތީގެ ކުށްތަކުގައި ހޯދާ މުދަލާއި ފައިސާ ދައުލަތަށް ނެގޭގޮތަށް ބަދަލުކުރުން ހިމެނެއެވެ. މީގެ ތެރޭގައި ކުށްކުރުމަށް ބޭނުންކުރި ފައިސާ ނުވަތަ މުދާ، ކުށްކޮށްގެން ހޯދާ މުދާ، އަދި ކުށްކޮށްގެން ހޯދާ މުދަލުން ހޯދާ ފައިސާއާއި މުދާ ހިމެނެއެވެ.

އަދި މި އިސްލާހުގެ ދަށުން ނޭޝަނަލް ޑްރަގް ކައުންސިލްގެ މެންބަރުންގެ އަދަދު 13 އަށް އިތުރުކުރުމާއި، މަސްތުވާތަކެއްޗަށް ދެވިހިފާފައިވާ މީހުންނަށް ދެވޭ ފަރުވާގެ ނިޒާމު އިތުރަށް ހަރުދަނާކުރުމަށް ވެސް ވަނީ ހުށަހަޅުއްވާފައެވެ.