ޕާކިސްތާނުގެ ކުރީގެ ބޮޑުވަޒީރު ޢިމްރާން ޚާނާއި އޭނާގެ އަނބިކަނބަލުން ބުޝްރާ ބީބީގެ މައްޗަށް ޓެރަރިޒަމްގެ ދަޢުވާ އުފުލައިފިއެވެ. މި ދަޢުވާ އުފުލާފައިވަނީ ފާއިތުވި ހަފުތާގައި އިސްލާމާބާދުގައި ހިނގި މުޒާހަރާތަކާއި ގުޅިގެންނެވެ.

ޕާކިސްތާން ސަރުކާރުން ހާމަކުރި ގޮތުގައި، ޢިމްރާން ޚާނާއި ބުޝްރާ ބީބީގެ އިތުރުން ޕާކިސްތާން ތަހްރީކް-އެ-އިންސާފް (ޕީޓީއައި) ޕާޓީގެ ގިނަ އަދަދެއްގެ މެންބަރުންގެ މައްޗަށްވެސް ދަޢުވާ އުފުލާފައިވެއެވެ. މި ދަޢުވާތަކުގެ ތެރޭގައި ޓެރަރިޒަމްގެ އިތުރުން، ވެރިރަށުގައި މުޒާހަރާކުރުން މަނާކުރާ ޤާނޫނާއި ޚިލާފުވުމާއި، ފުލުހުންނަށް ހަމަލާދިނުމާއި، މީހުން ވަގަށްނެގުމާއި، ސަރުކާރުގެ މަސައްކަތަށް ހުރަސްއެޅުން ހިމެނެއެވެ.

މުޒާހަރާތައް ފެށުނީ އާދިއްތަ ދުވަހު އިސްލާމާބާދަށް ގޮސް ޢިމްރާން ޚާންގެ "އެންމެ ފަހުގެ ގޮވާލުމަށް" އިޖާބަދިން ޕީޓީއައި ޕާޓީގެ 1،000 އާ ގާތްކުރާ މެންބަރުންނެވެ. މުޒާހަރާގައި ބައިވެރިވި ގިނަ ފަރާތްތައް މިހާރުވެސް ވަނީ ހައްޔަރުކޮށްފައެވެ.

ޕީޓީއައިގެ މުއައްސިސް، ޢިމްރާން ޚާން ހުރީ 2023 ވަނަ އަހަރުގެ އޮގަސްޓް މަހުން ފެށިގެން ޖަލުގައެވެ. އޭނާ އާއި ދެކޮޅަށް އެތައް ޖިނާއީ މައްސަލަތަކެއް ހުށަހެޅިފައިވެއެވެ. ބުޝްރާ ބީބީ ވެސް މިއަހަރު 9 މަސްދުވަހު ޖަލުގައި ހޭދަކުރުމަށްފަހު އޮކްޓޯބަރު މަހު ވަނީ ދޫކޮށްލާފައެވެ.

މުޒާހަރާގައި އިސްކޮށް ހަރަކާތްތެރިވީ ބުޝްރާ ބީބީ އާއި ޕީޓީއައިގެ ޚައިބަރ ޕަޚްތުންޚްވާ ޕްރޮވިންސްގެ ޗީފް މިނިސްޓަރ ޢަލީ އަމީން ގަންދަޕޫރެވެ. މުޒާހަރާކުރި ފަރާތްތަކުން ޢިމްރާން ޚާން ދޫކޮށްލުމަށް ގޮވާލުމުގެ އިތުރުން އެހެނިހެން ޑިމާންޑްތަކެއްވެސް ކޮށްފައިވެއެވެ.