އިސްރާއީލުގެ ދައުލަތް ރޫޅާލައި، ޓެލްއަވީވް ހިމެނޭ ގޮތަށް މިހާރު އިސްރާއީލުގެ ކޮންޓްރޯލްގެ ދަށުގައިވާ ހުރިހާ ސަރަހައްދުތަކެއް މިނިވަން ކުރަން ކުރާ މަސައްކަތް ދެމިއޮންނާނެ ކަމަށް ބުނާ އީރާނުގެ އިސްލާމީ އިންގިލާބުގެ ލީޑަރު އާޔަތުالله ސެއިދު އަލީ ޚާމަނާއީ މީޑިއާއަށް ތަސްވީރަކުން މެސެޖެއް ދެއްވައިފިއެވެ.

ޚާމަނާއީގެ ފާރިސީ ބަހުން ލިޔެފައިވާ އެ ތަސްވީރުގައި ވަނީ އަމާންކަމާއި މިނިވަންކަން ރަމްޒުކޮށްދޭ ހުދު ދިދައަކާއެކު އިސްރާއީލުގެ ޓޭންކަރެއްގެ އެއްބައި ވަޅުލާފައިވާ ތަސްވީރެއް ދައްކާލާފައެވެ.

ޚާމަނާއީ އަބަދުވެސް ވިދާޅުވަނީ އިސްރާއީލު ދައުލަތަކީ ހަރާމް ދައުލަތެކެވެ. ޣައިރު ޤާނޫނީ ގޮތުން އިނގިރޭސީވިލާތާއި އެމެރިކާގެ ތާޢީދާއިއެކު މެދުއިރުމަތި ހަލާކުކޮށްލުމަށް ގެންގުޅޭ ޓެރަރިސްޓް ޖަމާޢަތެއް ކަމަށެވެ. އެހެންކަމުން، އެ ސަރަޙައްދުގައި އެ ދައުލަތް އޮވެގެން ނުވާނެ ކަމަށާއި، އެއީ އަނިޔާވެރި ކަމެއް ކަމަށް ޚާމަނާއީ ވިދާޅުވެއެވެ.

އިސްރާއީލާއި ފަލަސްތީނުގެ މައްސަލައިގެ ހައްލެއް އޮތީ ގުދުސް (އަލް ޤުދުސް) އާއި ޓެލް އަވީވް ފަދަ މުހިންމު ސިޓީތައް ހިމެނޭ ގޮތަށް ތާރީހީ ފަލަސްތީނު މުޅިން މިނިވަން ކުރުމުގައި ކަމަށް އޭނާ ކުރިން ވިދާޅުވެފައިވެ އެވެ.

ޚާމަނާއީ ވަނީ އަލްއަގްސާ ތޫފާން ފަދަ މިހާރު ހިނގަމުންދާ އަނިޔަވެރިކަން ބަލަހައްޓައިގެން ނުތިބެވޭނެ ކަމަށް ބުނެ އިސްރާއީލާއި ދެކޮޅަށް ކުރާ ޖިހާދަށް ބާރުއަޅުއްވާފަ އެވެ.

ޣައްޒާގެ ހަމާސް، ލުބުނާނުގެ ހިޒްބުالله އަދި ޣިރާޤާއި ޔަމަނުގެ އެހެން ފެކްޝަންތައް ހިމެނޭ ގޮތަށް އިސްރާއީލާއެކު މި އޮޕަރޭޝަން ފެށީ މިދިޔަ އޮކްޓޯބަރު މަހު ޣައްޒާއަށް އިސްރާއީލުން އަރައިގަތުމުންނެވެ. މިކަމުގެ ސަބަބުން އިސްރާއީލަށް ބޮޑެތި ގެއްލުންތަކެއް ލިބިފައިވާއިރު، އެތައް ސަތޭކަ ސިފައިންނެއް މަރުވެ، 240 އަށް ވުރެ ގިނަ މީހުން ރަހީނުކޮށް، އިސްރާއީލުގެ ގިނަ ޢަދަދެއްގެ ޒަމާނީ ސާމާނުތައް ނައްތާލާފައިވެ އެވެ. ހިޒްބުاللهގެ ދައުރުގެ ސަބަބުން އިސްރާއީލުން ލުބުނާނާއެކު ހަނގުރާމަ ހުއްޓާލަން މަޖުބޫރުވީ 13 މަސް ދުވަހުގެ ހަމަނުޖެހުންތަކަށް ފަހު އިސްރާއީލަށް ބޮޑެތި ގެއްލުންތަކެއް ލިބެން ފެށުމުންނެވެ. އިސްރާއީލަށް ބިރެއް ނެތި ވައިގެ މަގުން ބޮން އަޅަން ކެރެނީ އާރެއް ބާރެއް ނެތް ހަތިޔާރެއް ނެތް ފަލަސްޠީން މުސްލިމުންނާއި ދެކޮޅަށެވެ.

ހިޒްބުاللهގެ ކުރިމަތީގައި އިސްރާއީލުން ކުޑަކަކޫ ޖެހިއިރު، މި އޮޕަރޭޝަންގެ ކާމިޔާބީ ފާހަގަކޮށް ހިޒްބުاللهއިން ނެރުނު ބަޔާންތަކުގައި ވަނީ ފަލަސްތީނުގެ ރައްޔިތުންނާއިއެކު ދެމިއޮތުމަށް ވައުދުވާ ކަމަށާއި، އަލް ޤުދުސް (ގުދުސް) މިނިވަން ކުރުމަށް ގޮވާލާފައެވެ.

އަނެއްކޮޅުން ހިޒްބުاللهއާއެކު ހަނގުރާމަ ހުއްޓާލުމުގެ ސަބަބުން އިސްރާއީލުގެ ބޮޑުވަޒީރު ނަތަންޔާހޫގެ އެ ސަރަހައްދުގައި އަސްކަރީ ބާރުވެރިކަން ހޯދުމުގެ އުންމީދުތައް ފުނޑުފުނޑުވެގެން ދިޔަކަން ފާހަގަކޮށް ހަމާސްއިން ވަނީ ހިޒްބުاللهގެ މަސައްކަތަށް ތައުރީފުކޮށްފަ އެވެ.

އާޔަތުالله ޚާމަނާއީ އިތުރަށް ވަނީ އިސްރާއީލުން ހިންގާފައިވާ ހަނގުރާމައިގެ ޖަރީމާތަކާއި ދެކޮޅަށް އިސްރާއީލުގެ ލީޑަރުންގެ މައްޗަށް ދައުވާ ކުރުމަށް އިލްތިމާސް ކުރައްވައި، ނަތަންޔާހޫއާއި ދެކޮޅަށް ހަރުކަށި ފިޔަވަޅުތައް އަޅަން ލަފާދެއްވާފަ އެވެ.