މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ވިޒިޓް މޯލްޑިވްސްއިން ވޯލްޑް ޓްރެވަލް އެވޯޑްސް 2024 ގައި ހޯދާފައިވާ ކާމިޔާބީތައް ފާހަގަކުރުމުގެ ގޮތުން މިއަދު ޚާއްސަ ހަރަކާތެއް ބާއްވައިފިއެވެ. މި ހަރަކާތް ބޭއްވުނީ ވެލާނާ އިންޓަރނޭޝަނަލް އެއަރޕޯޓުގެ ވޯޓަރފްރަންޓްގައެވެ.

ރާއްޖެއަށް މި އަހަރު ވަނީ ވޯލްޑްސް ލީޑިންގ ޑެސްޓިނޭޝަންގެ މަޤާމު ފަސްވަނަ ފަހަރަށް ލިބިފައެވެ. މީގެ އިތުރުން ފުރަތަމަ ފަހަރަށް ވޯލްޑްސް ލީޑިންގ ގްރީން ޑެސްޓިނޭޝަންގެ މަޤާމު ވެސް ވަނީ ރާއްޖެއަށް ލިބިފައެވެ. މި ޝަރަފުވެރި އެވޯޑްތައް ލިބުމާއި ގުޅިގެން ބޭއްވުނު މި ހަރަކާތުގައި މިނިސްޓަރ އޮފް ޓޫރިޒަމް، އިބްރާހިމް ފައިސަލް އާއި އެމްއެމްޕީއާރްސީގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިއުރީއާއި އަދި މޯލްޑިވްސް އެއަރޕޯޓްސް ކޮމްޕެނީގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު ބައިވެރިވެވަޑައިގެންނެވިއެވެ.

މި ހަރަކާތުގައި ވާހަކަފުޅު ދައްކަވަމުން އެމްއެމްޕީއާރުސީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ މިއީ ރާއްޖެއަށް ލިބުނު ވަރަށް ބޮޑު ޝަރަފެއް ކަމަށެވެ. އަދި މިއީ ދަތުރުފަތުރުގެ ޚާއްޞަ ތަޖުރިބާތަކާއި ދެމެހެއްޓެނިވި ފަތުރުވެރިކަން ޕްރޮމޯޓް ކުރުމަށް އެ ކުންފުނިން ކުރާ ވަޢުދު ދައްކުވައިދޭ ކަމެއް ކަމަށްވެސް ޝިއުރީ ވިދާޅުވިއެވެ.

"މި އެވޯޑަކީ ދުނިޔޭގެ ފެންވަރުގެ މަންޒިލެއްގެ ގޮތުގައި ރާއްޖެ މަތިކުރުމަށް ފަތުރުވެރިކަމުގެ ސިނާއަތުގެ ސްޓޭކްހޯލްޑަރުންގެ ބުރަ މަސައްކަތާއި ޚިދުމަތްތެރިކަމުގެ ހެކިތަކެއް،" ޝިއުރީ ވިދާޅުވިއެވެ.

މި ހަރަކާތުގެ ތެރޭގައި ރާއްޖޭގެ ގްލޯބަލް ބްރޭންޑް ވިޒިބިލިޓީ އިތުރަށް ކުރިއަރުވައި، ރާއްޖޭގެ ކާމިޔާބީތަކުގެ އަގުވަޒަންކޮށް 'މޯލްޑިވްސް ސައިނޭޖް' އެއް އެއާޕޯޓުގައި ދައްކާލެވުނެވެ. މިއީ ރާއްޖެއަށް ޒިޔާރަތްކުރާ ފަތުރުވެރިންނަށް ރާއްޖޭގެ ކާމިޔާބީތައް ދައްކުވައިދިނުމަށް އެޅުނު މުހިންމު ފިޔަވަޅެކެވެ.