"އާބަން ޑިވެލޮޕްމަންޓް ބިލް" ރައްޔިތުންގެ މަޖިލީހުން މިއަދު ފާސްކޮށްފިއެވެ.
ސަރުކާރުގެ ފަރާތުން މި ބިލު ހުށަހެޅުއްވީ ވިލިނގިލި ދާއިރާގެ ޕީއެންސީ މެންބަރު އާޒިމް އަބްދުލް އަޒީޒެވެ. މި ބިލަކީ ރާއްޖޭގެ އެކި ސަރަޙައްދުތަކުގައި އާބަން ސެންޓަރުތައް ތަރައްޤީކުރުމުގެ އުޞޫލު ބަޔާންކޮށްފައިވާ ބިލެކެވެ.
މި ބިލު ފާސްކުރުމަށް ވޯޓު ދެއްވާފައިވަނީ 70 މެންބަރުންނެވެ. އަދި ބިލު ފާސްކުރުމާ ދެކޮޅަށް ވޯޓުދެއްވާފައިވަނީ 11 މެންބަރުންނެވެ.
Advertisement
އާބަން ސަރަޙައްދުތައް ކަނޑައެޅުމާއި އެފަދަ ސަރަޙައްދު ތަރައްޤީކުރުމާ ގުޅޭ ކަންކަން ހަރުދަނާކޮށް ޤާނޫނީ އޮނިގަނޑެއްގެ ދަށުން ހިންގުމަށް އެކުލަވާލި މި ބިލުގައި އާބަން ސެންޓަރުތައް ތަރައްޤީކޮށް ހިންގުމުގެ އަސާސީ މިންގަނޑުތަކާއި އާބަން ސަރަޙައްދުތަކުގައި ހިންގާ ތަރައްޤީގެ މަޝްރޫޢުތައް މޮނިޓާކޮށް ފިޔަވަޅު އެޅުމާ ބެހޭ އުޞޫލުތައް ވަނީ ބަޔާންކޮށްފައެވެ.
އާބަން ޑިވެލޮޕްމަންޓްގެ ބިލްގެ ބޭނުމަކީ ދިވެހިރާއްޖޭގެ ބިނާވެށި ޕްލޭންކޮށް ހިންގުމާ ގުޅޭ ކަންކަން ހަރުދަނާ ގާނޫނީ އޮނިގަނޑެއްގެ ދަށުން އިންތިޒާމު ކުރުމަށްޓަކައި، ދެމެހެއްޓެނިވި އަދި ޒިންމާދާރު ގޮތެއްގައި ބިމުގެ ބޭނުން ހިފޭނެ މޭރުމުން ބިނާވެށި ޕްލޭންކޮށް ހިންގުމާއި އެ ޕްލޭންތަކާ އެއްގޮތްވާ ގޮތުގެ މަތިން ބިން ތަރައްގީކޮށް ހިންގުމުގެ އަސާސީ މިންގަނޑުތަކާއި ތަރައްގީގެ މަސައްކަތްތައް މޮނިޓަކޮށް ފިޔަވަޅު އެޅުމާބެހޭ އުސޫލުތައް ބަޔާން ކުރުމެވެ.
