މިދިޔަ ސަރުކާރުން ގެދޮރުވެރިޔާ ސްކީމްގެ ދަށުން ދޫކޮށްފައިވާ 4،000 ފްލެޓްގެ ރީ-އިވެލުއޭޝަންގެ މަސައްކަތަށް އެއްވެސް ފަރާތަކުން ނުފޫޒެއް ނުފޯރުވޭނެ ކަމުގެ ފުރިހަމަ ޔަގީންކަން ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން މިއަދު ދެއްވައިފިއެވެ.

އެ ވުޒާރާއިން ނެރުނު ބަޔާނެއްގައި ބަޔާންކޮށްފައިވަނީ، މި ސްކީމާ ގުޅިގެން ކުރިއަށްދާ ރީ-އިވެލުއޭޝަންގެ މަސައްކަތްތަކަށް ރައްޔިތުންގެ މަޖިލީހުގެ މެންބަރުންނާއި ބައެއް ސިޔާސީ ފަރާތްތަކުން ނުފޫޒު ފޯރުވާކަމަށް ބުނެ ފަތުރަމުންދާ ޚަބަރުތަކަކީ ހަގީގަތާ ޚިލާފު ވާހަކަތަކެއް ކަމަށެވެ. އަދި މިފަދަ ވާހަކަތަކުން ރައްޔިތުންގެ ހިތްތަކުގައި ނުތަނަވަސްކަން އުފެދޭ ކަމަށް ވެސް ބުންޏެވެ.

"މި ސްކީމާއި ގުޅިގެން ކުރިއަށްދާ ރީ-އިވެލުއޭޝަންގެ މަސައްކަތްތަކަށް އެއްވެސް ފަރާތަކުން ނުފޫޒެއް ނުފޯރުވޭނެކަމުގެ ފުރިހަމަ ޔަގީންކަން އެންމެހައި ރައްޔިތުންނަށް އަރުވަމެވެ،" ވުޒާރާއިން ނެރުނު ބަޔާނުގައި ވެއެވެ.

ވުޒާރާގެ މަޤްޞަދަކީ މި ސްކީމްގެ ދަށުން ފްލެޓްތައް ލިބިގެންދާނީ އެންމެ ޙައްޤުވެރި ފަރާތްތަކަށް ކަމުގައި ކަނޑައެޅިގެންދިއުން ކަމަށްވެސް އެ ވުޒާރާއިން ބުންޏެވެ.

މި ފްލެޓްތަކަކީ އިންޑިއާގެ އެގްޒިމް ބޭންކުން 227 މިލިއަން ޑޮލަރުގެ ސޮވެރިން ގެރެންޓީއެއް ދިވެހި ސަރުކާރަށް ދީގެން ހަދާފައިވާ ފްލެޓްތަކެކެވެ. މި މަޝްރޫޢުގައި ހިމެނެނީ 32 ޓަވަރެވެ. މީގެ ތެރޭގައި ތިން ކޮޓަރީގެ 2800 އެޕާޓްމަންޓާއި ދެ ކޮޓަރީގެ 1200 އެޕާޓްމަންޓް ހިމެނެއެވެ.

މިދިޔަ ސަރުކާރުގެ ދައުރު ނިމުމާއި ކައިރިވެފައި ވަނިކޮށް ކޮރަޕްޝަނަށް ،ަގު ފަހިވާ ގޮތަށް ފްލެޓް ލިބޭ މީހުންގެ ލިސްޓު އާންމުކުރުމާއި ގުޅިގެން، ގިނަ ބައެއްގެ ޝަކުވާތަކާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ވަނީ އެކަން ހުއްޓުވާފައެވެ. އޭސީސީގެ ތަޙްޤީޤަށްފަހު، ކުރީ ސަރުކާރުން ދޫކުރި 4،000 ފްލެޓް ދީފައިވާ މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށް ފާހަގަކުރެވުނެވެ.

މި ވަގުތު، ފްލެޓް ލިބޭ މީހުންގެ ވަގުތީ ލިސްޓް އާންމުކުރުމަށް އިތުރު މުއްދަތެއް ބޭނުންވާ ކަމަށް މިނިސްޓްރީން ކުރިން ވިދާޅުވެފައިވެއެވެ. އަދި ފްލެޓްތައް ހަވާލުކޮށް، މީހުން ދިރިއުޅެން ފެށުމުގެ ކުރިން ކޮންމެ އިމާރާތެއްގައި ވެސް އަސާސީ ޚިދުމަތްތައް ލިބޭނެ ކަމަށް އެފްޑީސީން ބުންޏެވެ.

މި މަޝްރޫޢުގެ މަސައްކަތް ކުރިއަށް ގެންދަނީ އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާއި ނެޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެންބީސީސީ) އިންނެވެ. 32 ޓަވަރުގެ ތެރެއިން 16 ޓަވަރު އެންބީސީސީން ކުރާ އިރު، އަނެއް 16 ޓަވަރުގެ މަސައްކަތް ކުރަނީ ޖޭއެމްސީންނެވެ.

ދެ ކޮޓަރީގެ އެޕާޓްމަންޓްތަކަކީ 650 އަކަފޫޓުގެ ޔުނިޓްތަކެވެ. އަދި ތިން ކޮޓަރީގެ އެޕާޓްމަންޓްތަކަކީ 900 އަކަފޫޓުގެ ޔުނިޓްތަކެވެ.

މި ފްލެޓްތަކުގެ ރީ-އިވެލުއޭޝަން މަސައްކަތް ކުރިއަށްދާއިރު، އެއްވެސް ނުފޫޒެއް ނުފޯރުވޭނެ ކަމަށް ވުޒާރާއިން ދެއްވާފައިވާ ޔަގީންކަމާއެކު، ގިނަ ރައްޔިތުން މި މަޝްރޫޢުގެ ނަތީޖާއަށް އިންތިޒާރު ކުރަމުންދާކަން ފާހަގަކުރެވެއެވެ. ވުޒާރާއިން ވަނީ މި މަސައްކަތް ވީހާވެސް އަވަހަކަށް ނިންމައި، ފްލެޓްތައް ޙައްޤުވެރި ފަރާތްތަކަށް ލިބިދިނުމަށް މަސައްކަތް ކުރާނެ ކަމަށް ބުނެފައެވެ.