ޕީޕަލްސް ނެޝަނަލް ކޮންގްރެސް (ޕީއެންސީ)ގެ ދާއިރާތަކުގެ އިންތިޚާބުގެ ވަގުތީ ނަތީޖާ އިޢުލާންކޮށްފައިވާއިރު، ޖުމްލަ 1984 ކެންޑިޑޭޓުން ހޮވިއްޖެއެވެ. މި ނަތީޖާ އިއުލާނު ކުރީ ވޯޓުލާ މަރުކަޒުތަކުގައި ވޯޓު ގުނައި އެ މަރުކަޒުތަކުގައި އިއުލާނުކުރި ގޮތަށްކަން ކަށަވަރު ކުރުމަށް ފަހުގައި ކަމަށް އެ ޕާޓީން ނެރުނު އިއުލާނެއްގައި ބުންޏެވެ.

ރާއްޖޭގެ އެކިކަންކޮޅުތަކުގައި ބެހެއްޓި 143 ވޯޓު ފޮށީގެ ކަރުދާސްތަކާއި ނަތީޖާ ޝީޓުތަކުގެ އަސްލު ޕާޓީގެ ރަސްމީ އޮފީހަށް ލިބުމުން، ހުށަހެޅިފައިވާ ޝަކުވާތަކަށް ރިއާޔަތް ކުރުމަށްފަހު ދާއިމީ ނަތީޖާ އިއުލާނު ކުރާނެ ކަމަށް ވެސް އެ އިއުލާނުގައި ބަޔާންކޮށްފައިވެއެވެ. އަދި ދާއިމީ ނަތީޖާ އިއުލާނު ކުރުމަށްފަހު، 72 ގަޑިއިރުގެ ތެރޭގައި އިންތިޚާބުވި މެންބަރުންގެ މެދުގައި ނަގާ ވޯޓަކުން އިންތިޚާބު ކުރަންޖެހޭ މަޤާމުތައް ކަނޑައެޅުމުގެ މަރުޙަލާ ކުރިއަށް ގެންދާނެ ކަމަށްވެސް ޕާޓީން ފާހަގަކުރިއެވެ.

މިދިޔަ ހޮނިހިރު ދުވަހު ބޭއްވި މި އިންތިޚާބުގައި 648 ކެންޑިޑޭޓުން ވާދަކުރި ކަމަށް ޕީއެންސީން ބުންޏެވެ. ޖުމްލަ 1984 މަޤާމަށް މީހުން އިންތިޚާބު ކުރުމަށް ހަމަޖެހިފައި ވީނަމަވެސް، މީގެ ތެރެއިން 1300 މަޤާމަށް އެންމެ ކެންޑިޑޭޓަކު ކުރިމަތިލައިފައިވާތީ، އެ 1300 މަޤާމަށް ވަނީ އިންތިޚާބަކާ ނުލައި މީހުން ހޮވިފައިކަމަށް އެ ޕާޓީން ބުންޏެވެ.

ޕާޓީން އިތުރަށް ބުނީ، ވަގުތީ ނަތީޖާއާ މެދު އެއްވެސް ޝައްކެއްވާނަމަ ޝަކުވާ ހުށަހެޅުމަށް ހުޅުވާލާފައިވާ ކަމަށެވެ. މި އިންތިޚާބަކީ ޕީއެންސީގެ އެތެރޭގެ އިންތިޚާބެއް ކަމަށްވާތީ، މި އިންތިޚާބުގެ ނަތީޖާއަށް ޕާޓީގެ މެންބަރުންނާއި ޤައުމީ ސިޔާސީ މަޝްރަޙު ބަލަހައްޓާ ފަރާތްތަކުން ޝައުޤުވެރިކަމާއެކު ބަލަމުންދާނެ ކަމަށެވެ.