އ.ދ އަތޮޅުގެ ފަސް ސްކޫލަކުން އިންޓަރ ސްކޫލް ވޮލީބޯޅަ މުބާރާތުގައި ބައިވެރިވެއްޖެއެވެ. މިގޮތުން އ.ދ އަތޮޅު މަދަރުސާ ( މާމިގިލި )، ފެންފުށި ސްކޫލް، ދިގުރަށު ސްކޫލް، ދަނގެތީ ސްކޫލު އަދި ކުނބުރުދޫ ސްކޫލް ވަނީ ބައިވެރިވެފައިވެއެވެ.

• އދ. އަތޮޅު މަދަރުސާ ( 16 އަހަރުން ދަށުގެ ފިރިހެން އަންހެން ޓީމު އަދި 14 އަހަރުން ދަށުގެ ފިރިހެން ޓީމު)
• ދަނގެތި ސްކޫލް ( 16 އަހަރުން ދަށުގެ ފިރިހެން އަދި އަންހެން ޓީމު)
• ފެންފުށި ސްކޫލް ( 16 އަހަރުން ދަށުގެ ފިރިހެން އަދި އަންހެން ޓީމު)
• ކުނބުރުދޫ ސްކޫލް (16 އަހަރުން ދަށުގެ ފިރިހެން އަދި އަންހެން ޓީމު)
• ދިގުރަށު ސްކޫލް ( 14 އަހަރުން ދަށުގެ ފިރިހެން ޓީމު)

މިދިޔަ އަހަރު އަލަށް ވާދަ ކޮށްގެން 16 އަހަރުން ދަށުގެ ފިރިހެން ޑިވިޜަނުގެ ޗެމްޕިއަން އަދި އަންހެން ޑިވިޜަނުގެ ދެވަނަ ހޯދާފައިވާ ކުނބުރުދޫ ސުކޫލުން މިފަހަރު ވެސް އެ ސްކޫލުގެ 16 އަހަރުން ދަށުގެ ފިރިހެން އަދި އަންހެން ޓީމު ވަނީ ބައިވެރިވެފައެވެ.

މިދިޔަ އަހަރުގެ އިންޓަ ސްކޫލް ވޮލީބޯޅަ މުބާރާތުގެ ފައިނަލުގައި ބައްދަލުކޮށްފައިވަނީ އދ އަތޮޅު މަދަރުސާ އަދި ކުނބުރުދޫ ސުކޫލެވެ. އެ މުބާރާތް ކުނބުރުދޫ ސްކޫލުން ކާމިޔާބުކުރީ އެއްވެސް މެޗަކުން ބަލިނުވެ، ފައިނަލުގައި ސީދާ ތިން ސެޓުންނެވެ.

އ.ދ އަތޮޅުން ޒުވާން މޮޅެތި ވޮލީ ކުޅުންތެރިން އުފެއްދުމަށް އަމާޒު ހިފާފައިވާއިރު ފާހަގަކޮށްލަން ޖެހޭ ކަމަކީ ކުނބުރުދޫ އަށް ނިސްބަތްވާ 4 ކުޅުންތެރިޔަކާއި، މާމިގިލީ ކުޅުންތެރިއަކާއި، ދަނގެތީ ކުޅުންތެރިއެއްވަނީ ގައުމީ 20 އަހަރުން ދަށުގެ ޓީމަށް ނެގި ލަންކާގައި އޮތް"ކާވާ 20 އަހަރުންދަށުގެ ވޮލީބޯޅަ މުބާރާތުގެ ފިރިހެން ޑިވިޜަނުގައި ކުޅެފައެވެ.