މިއަހަރުގެ މިހާތަނަށް ރާއްޖޭގައި ފާނަބަސަންދު ޖެހިގެން 2900 އަށްވުރެ ގިނަ ކޭސް ރިޕޯޓްކޮށްފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.
އެޗްޕީއޭއިން މިމަޢުލޫމާތު ހާމަކޮށްފައިވަނީ ރާއްޖޭގެ އެކި ކަންކޮޅުތަކުގައި ފާނަބަސަންދުގެ ކޭސްތައް ރިޕޯޓްކުރަމުންދާތީ، ރައްކާތެރިކަމުގެ ފިޔަވަޅު އެޅުމަށް އިލްތިމާސްކުރައްވައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
އެޗްޕީއޭއިން ދެއްވާފައިވާ މަޢުލޫމާތުގައިވާ ގޮތުން،2024 ވަނަ އަހަރުގެ ނޮވެމްބަރު މަހާއި ހަމައަށް މުޅި ރާއްޖެއިން 2977 މީހުން ވަނީ ފާނަބަސަންދު ޖެހިގެން ރިޕޯޓްކޮށްފައެވެ. މީގެ ތެރެއިން 1506 ކޭސް ރިޕޯޓްކޮށްފައިވަނީ މާލެ ސަރަހައްދުންނެވެ. އަދި 1471 ކޭސް ރިޕޯޓްކޮށްފައިވަނީ އަތޮޅުތަކުންނެވެ.
Advertisement
މީގެއިތުރުން، މި މަހުގެ ތެރޭގައި ކ. ގުޅިން ފާނަބަސަންދުގެ 11 ކޭސް ރިޕޯޓްކޮށްފައިވާ ކަމަށްވެސް އެޗްޕީއޭއިން ބުނެފައިވެއެވެ. މި 11 ކޭސްގެ ތެރެއިން ދެ މީހަކަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) ގައި އިތުރު ފަރުވާ ދެމުންދާ ކަމަށް ވެސް އެ އިދާރާއިން ހާމަކޮށްފައިވެއެވެ.
ފާނަބަސަންދަކީ ވައިރަހަކުން ޖެހޭ ބައްޔެކެވެ. މި ބަލީގެ އާންމު އަލާމާތްތަކުގެ ތެރޭގައި ހުންއައުން، ވަރުދެރަވުން، ނޭފަތުން ފެންއައުން އަދި ގައިން ބިހިތަކެއް ނެގުން ހިމެނެއެވެ. މި ބަލި އާންމުކޮށް ކުޑަކުދިންނަށް ޖެހުނު ނަމަވެސް ބޮޑެތި މީހުންނަށްވެސް މި ބަލި ޖެހެއެވެ.
ބަލިން ރައްކާތެރިވުމަށް އެޗްޕީއޭއިން އާންމުންނަށް އިލްތިމާސްކޮށްފައިވަނީ ބަލި ޖެހިފައިވާ މީހުންގެ ގާތަށް ޒިޔާރަތް ނުކުރުމަށާއި، ބަލިޖެހިފައިވާ މީހުން އެކަހެރިވެ ތިބުމަށެވެ. އަދި ބަލި ފަސޭހަވަންދެން އަންނައުނާއި ތުވާލިފަދަ ހިފައި ގެންގުޅޭ ތަކެތި ވަކިކުރުމަށް ވެސް އެޗްޕީއޭއިން އިރުޝާދު ދެއްވާފައިވެއެވެ.
ފާނަބަސަންދުގެ ކޭސްތައް އިތުރުވަމުންދާތީ، އާންމު ރައްޔިތުން ވީހާވެސް ބޮޑަށް ސަމާލުވެ، ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން ގޮވާލާފައިވެއެވެ.
