ކ. ގުޅިން ފެނިފައިވަނީ ނިއުމޯނިއާގެ ވޭދަނަތަކެއް ނޫންކަމަށާއި، އެއީ ފާނަބަސަންތުގެ (ޗިކެންޕޮކްސް) ވޭދަނަތަކެއްކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ހާމަކޮށްފިއެވެ.
މީސްމީޑިއާގައި ގުޅީގައި ނިއުމޯނިއާގެ ނުރައްކާތެރި ވައްތަރެއް ފެތުރެމުންދާކަމަށް ޚަބަރު ފެތުރުމާއި ގުޅިގެން، އެޗްޕީއޭއިން ބުނިގޮތުގައި މި މަހު ގުޅިން ފާނަބަސަންތުގެ 11 ވޭދަނަ ރިޕޯޓުކުރެވިފައިވެއެވެ.
ގުޅީ ކައުންސިލްގެ ރައީސް، މޫސާ ސަފީލް ވިދާޅުވިގޮތުގައި ރަށުގައި މިވަގުތު ފާނަބަސަންތުގެ ވޭދަނަ އުޅޭކަން އެނގިފައިވެއެވެ.
Advertisement
އެޗްޕީއޭއިން އިތުރަށް ހާމަކުރިގޮތުގައި، މި އަހަރުގެ ނޮވެންބަރާ ހަމައަށް މުޅި ރާއްޖެއިން ފާނަބަސަންތުގެ 2،977 ވޭދަނަ ރިޕޯޓުކުރެވިފައިވެއެވެ. މީގެ ތެރެއިން 1،506 ވޭދަނައަކީ މާލެ ސަރަޙައްދުން ފެނުނު ވޭދަނަތަކެވެ.
ފާނަބަސަންތުގެ ވޭދަނަތައް ރާއްޖޭގެ އެކި ހިސާބުތަކުން ކޮންމެ އަހަރަކުވެސް ރިޕޯޓުކުރެވޭކަމަށް އެޗްޕީއޭއިން ފާހަގަކޮށްފައިވެއެވެ. އަދި ގުޅިން ފެނުނު ވޭދަނަތަކުގެ ތެރެއިން ދެ މީހަކަށް އިންދިރާ ގާންދީ މެމޯރިއަލް ހޮސްޕިޓަލުގައި އެނދުމަތިކޮށްގެން ފަރުވާދެމުންދާކަމަށްވެސް އެޗްޕީއޭއިން ބުނެފައިވެއެވެ.
