ހުޅުމާލޭ "ހާފްވޭ ހައުސް" ކައިރިން ހިންގި މާރާމާރީއެއްގައި ވަޅި ޖަހާ މަރާލި، ގއ. ދާންދޫ ގޯލްޑް ލީފް، ހާރިސް އަބްދުލް ގަފޫރުގެ މަރުގެ މައްސަލައިގެ ދަޢުވާ ލިބޭ، ޏ.ފުވައްމުލަކު/ހޯދަނޑު، ހިލްޓަން، ޔާމީން ރަޝީދު ބަންދު ނުކުމަށް ހައި ކޯޓުން ނިންމައިފިއެވެ.
ހައިކޯޓުން އިއްޔެގެ އިސްތިޢުނާފުގެ މަޖިލީހުން މި މައްސަލަ ބެލި ތިން ފަނޑިޔާރުންގެ އިއްތިފާގުން ކަނޑައާޅާފައިވަނީ، އިސްތިއުނާފީ މަރުޙަލާގައި ޝަރީޢަތް ނިމެންދެން ޔާމީން ބަންދުގައި ބަހައްޓަންޖެހޭ ޤާނޫނީ ސަބަބެއް ނެތް ކަމަށެވެ.
މި މައްސަލައާއި ގުޅިގެން ހައިކޯޓުން ވަނީ ޔާމީންއަކީ މުޖުތަމަޢުގެ ސަލާމަތަށް ހުތި ކުރައްކަލެއްކަމަށް ބެލެވިދާނެ އެއްވެސް ހެއްކެ ދައުލަތުން ހުށަހަޅާފައިނުވާ ކަމަށް ފާހަގަކޮށްފައެވެ. އަދި ކުށުގެ ބާވަތާއި ސީރިއަސް ކަމަށް އެކަނި ބަރޯސާވެ އޭނާ ބަންދުގައި ބަހައްޓަން އަމުރެއް ނެރެވިދާނެކަމަށް ނުދެކޭ ކަމަށް ފާހަގަކޮށްފައެވެ.
Advertisement
މީގެ އިތުރުން ޔާމީން މައްސަލައިގެ ހެކިވެރިންނަށް ނުފޫޒު ފޯރުވުމުގެ ނުރައްކާ އޮތް ކަމަށް ދައުލަތުން ބުނާއިރު، މީގެ ކުރިން ޔާމީން އެފަދަ ޢަމަލެއް ކޮށްފައިވާކަން އަދި އެފަދަ ކަމެއް ކުރާކަން ނުވަތަ ކުރަން އުޅޭކަން ދައުލަތަށް ބުނެނުދެވޭ ކަމަށް ހައިކޯޓުގެ އަމުރުގައިވެއެވެ. މީގެ އިތުރުން ކްރިމިނަލް ކޯޓުގެ މަރުޙަލާއިން ޔާމީން މިނިވަންވެފައިވާ ކަމަށާއި، އެ މިނިވަންކަމުން އޭނާ މަޙުރޫމުކުރަންޖެހޭ ސަބަބެއް ދައުލަތަށް ކޯޓުގައި ދެއްކިފައި ނުވާ ކަމަށް މި ނިންމުމުގައި ވެއެވެ.
ޔާމީންގެ މައްޗަށް ދަޢުވާ ކޮށްފައިވަނީ 2017 ވަނަ އަހަރުގެ ސެމްޓެމްބަރު މަހު ހުޅުމާލެ ހާފްވޭ ހައުސްކައިރީ ހިނގި މާރާމާރީއެއްގައި ހާރިސް އަބްދުލްޣަފޫރު މަރާލިކަމުގެ ތުހުމަތުގައެވެ. ޔާމީންގެ މައްޗަށް ދަޢުވާ ކޮށްފައިވަނީ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ކުށުގެ ދަޢުވާ އެވެ. މި މައްސަލައިގައި މިދިޔަ އަހަރު ކްރިމިނަލް ކޯޓުން ވަނީ ހެކި ނެތް ކަމަށް ބުނެ ޔާމީން މިނިވަންކޮށްފައެވެ. އަދި ހަމަ މިދިޔަ އަހަރު މި މައްސަލަ ވަނީ ހައިކޯޓުގައި އިސްތިޢުނާފު ކޮށްފައެވެ.
