އިންޑިއާގެ އުއްތަރު ޕްރަދޭޝް ސްޓޭޓްގެ ކޯޝާމްބީ ޑިސްޓްރިކްޓްގައި ޤަޥާޢިދާއި ޚިލާފަށް ސިއްރު ހިންގި ބަޑިބޭސް ކާރުޚާނާއެއްގައި ވަރުގަދަ ގޮވުމެއް ގޮވައި، 13 މީހުން މަރުވެއްޖެއެވެ. މީގެ ދެދުވަސް ކުރިން ހިނގި މި ހާދިސާގައި މަރުވި މީހުންގެ ތެރޭގައި ގިނައީ ކާރުޚާނާ ކައިރީގައި ހުރި ގޭގޭގައި ދިރިއުޅެމުންދިޔަ ކުޑަކުދިންނެވެ.
ހޯމަދުވަހުގެ މެންދުރުފަހުގެ ވަގުތެއްގައި ހިނގި މި ގޮވުމުގެ ބާރުގަދަކަމުން، ކާރުޚާނާ ހިންގަމުންދިޔަ ސަރަހައްދުގެ ވަށައިގެން ހުރި ގިނަ ގެތަކެއް ވަނީ އެއްކޮށް ސުންނާފަތިވެފައެވެ.
ފުލުހުންނާއި މީޑިއާ ރިޕޯޓްތަކުން ބުނާގޮތުގައި، މި ހާދިސާގައި 11 ކުޑަކުދިން މަރުވެފައިވާއިރު، އެ ކުދިން މަރުވީ ގޮވުމުގެ ސަބަބުން ވެއްޓުނު ގޭގޭގެ ފާރުތަކާއި ފުރާޅުތަކުގެ ދަށުވެގެންނެވެ. މީގެ އިތުރުން 15 އަށްވުރެ ގިނަ މީހުން އެކިވަރުގެ ޒަހަމްތަކާއެކު ހޮސްޕިޓަލުގައި ދަނީ ފަރުވާ ހޯދަމުންނެވެ. އޭގެ ތެރެއިން ބައެއް މީހުންގެ ހަށިގަނޑު ވަރަށް ބޮޑަށް ފިހިފައިވާތީ، މަރުވި މީހުންގެ އަދަދު އިތުރުވުން އެކަށީގެންވާ ކަމަށް ސިއްހީ އިދާރާތަކުން ބުނެއެވެ.
Advertisement
މި ހާދިސާއާ ގުޅިގެން އުއްތަރު ޕްރަދޭޝްގެ ސަރުކާރުން ވަނީ މަރުވި ކޮންމެ މީހެއްގެ އާއިލާއަށް މާލީ އެހީތެރިކަން ފޯރުކޮށްދޭން ނިންމާފައެވެ. އަދި މި ކާރުޚާނާ ހިންގި އާއިލާގެ މީހުންނާ ދެކޮޅަށް ޖިނާއީ މައްސަލައެއް ރަޖިސްޓްރީކޮށް، ފުލުހުން ވަނީ އެ ފެކްޓަރީގެ ވެރިޔާގެ އަމިއްލަ ތިންބުރީގެ ބޮޑު އިމާރާތް ބުލްޑޯޒަރުން ތަޅާލާފައެވެ.
