މަސްވެރިންގެ ޤައުމީ ދަފްތަރުގައި މިހާތަނަށް 2,260 މަސްވެރިން ރަޖިސްޓްރީކޮށްފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ބުނެފިއެވެ.

މަސްވެރިކަމާ ބެހޭ ވުޒާރާއިން ބުނީ މަސްވެރިންގެ ޤައުމީ ދަފްތަރު އެކުލަވާލުމުގެ ބޭނުމަކީ މަސްވެރިންނަކީ ދައުލަތް ބަލައިގަންނަ ބަޔަކަށް ހެދުމާއި މަސްވެރިންނަށް ޚާއްޞަކޮށްގެން ސަރުކާރުން ހިންގާ ޕްރޮގްރާމްތަކުގެ ނަފާ ސީދާ މަސްވެރިންނަށް ފޯރުކޮށްދޭނެ ވަސީލަތެއް ޤާއިމްކުރުން ކަމަށެވެ. އެގޮތުން މަސްވެރިންގެ ޤައުމީ ދަފްތަރެއް އެކުލަވާލައި ދަފްތަރު ކުރުމުގެ މަސައްކަތް ފަށައިގަތީ ސަރުކާރުގެ ފުރަތަމަ 14 ހަފްތާ ތެރޭގައި ކަމަށް ވުޒާރާއިން ބުންޏެވެ.

މި މަސައްކަތް ވަރަށް ބާރަށް ކުރިއަށް ގެންގޮސް ކަނޑުމަހުގެ މަސްވެރިކަމުގައި ހަރަކާތްތެރިވާ ދޯނިތަކުގެ %80 ދަފްތަރު ކުރެވިފައިވާކަމަށް އެ ވުޒާރާއިން ބުންޏެވެ. އަދި 2,260 އެއްހާ ފަޅުވެރިން ދަފްތަރުކުރެވިފައިވާ ކަމަށް ވުޒާރާއިން ބުންޏެވެ.

މަސްވެރިންނަށް މާލީ ވަސީލަތްތަކުގެ ފައިދާ ލިބިގަތުމަށް ހުރި ހުރަސްތައް ނައްތާލައި، މަސްވެރިކަމަކީވެސް ރާއްޖޭގައި ރަސްމީކޮށް ބަލައިގަންނަ ވަޒީފާއެއްކަމުގައި ހެދުމަށްޓަކައި، މަސްވެރިންގެ ޤައުމީ ދަފްތަރު ށ. ކޮމަންޑޫގައި އިފްތިތާޙްކޮށްފައިވަނީ 16 ފެބްރުއަރީ 2024 ގައެވެ. މިގޮތުން މިކަމަށް ތައްޔާރުކޮށްފައިވާ އޮންލައިން ޕްލެޓްފޯމުގައި ރަޖިސްޓަރީވުމުގެ ފުރުސަތުވެސް ވަނީ ހުޅުވާލާފައެވެ.

މަސްވެރިންގެ ދަފުތަރު އެކުލަވާލުމަށް ވުޒާރާގެ ޓިމުތަކުން 14 އަތޮޅަކަށް ދަތުރުކޮށްފައިވާ ކަމަށް ވުޒާރާއިން ބުންޏެވެ. މިއީ ޤައުމީ ފެންވަރެއްގައި ރާއްޖޭގައި މަސްވެރިންގެ ރަސްމީ ދަފްތަރެއް އެކުލަވާލެވޭ ފުރަތަމަ ފަހަރެވެ.