މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެރިކަން ރައްކާތެރިކުރުމަށް ގިނަ މަސައްކަތްތަކެއް ކުރަމުންދާކަމަށް މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.
މޫސުމަށް އަންނަ ބަދަލުތަކާ ގުޅޭގޮތުން އ.ދ.ގެ މުއާހަދާގެ 29ވަނަ ބައްދަލުވުން، ކޮޕް-29ގެ ހަވާސާގައި ބޭއްވުނު ފަތުރުވެރިކަމުގެ ދާއިރާގައި މޫސުމަށް އަންނަ ބަދަލުތަކާ ދެކޮޅަށް ކުރާ މަސައްކަތްތައް ހަރުދަނާކުރުމާ ގުޅޭ މިނިސްޓީރިއަލް ބައްދަލުވުމުގައި ވާހަކަފުޅު ދައްކަވަމުން ވަޒީރު ޠާރިޤު އިބްރާހީމް ވިދާޅުވީ، މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ފަތުރުވެރިކަމަށް ނޭދެވޭ އަސަރުތަކެއް ކުރާ ކަމަށާއި، މިކަން ހައްލުކުރުމަށް މަސައްކަތްތަކެއް ކުރަން ނިންމަވާފައިވާ ކަމަށެވެ.
ވަޒީރުގެ ވާހަކަފުޅުގައި، ކަނޑޫފާ ފަދަ ކާބަން ހިފަހައްޓާ މާހައުލުތައް ރައްކާތެރިކޮށް އާލާކުރުމަށް ރާއްޖެއިން ކުރަމުންގެންދާ މަސައްކަތްތައް ފާހަގަކުރެއްވިއެވެ. އަދި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކުން ރަށު ފެންވަރުގައި ކުރަމުންގެންދާ އެކި މަސައްކަތްތައްވެސް ފާހަގަކުރެއްވިއެވެ.
Advertisement
މީގެއިތުރުން، ކޮޕް-29ގައި ދިވެހިރާއްޖޭގެ ފުރަތަމަ ބައިއެނުއަލް ޓްރާންސްޕޭރަންސީ ރިޕޯޓު (ބީޓީއާރު) އ.ދ.ގެ މޫސުމަށް އަންނަ ބަދަލުތަކާ ބެހޭ އޮނިގަނޑު (ޔޫއެންއެފްސީސީސީ) އަށް ހުށަހަޅާފައިވާކަން ފާހަގަކޮށްލެވެއެވެ. މި ރިޕޯޓު ހުށަހެޅުމާ ގުޅިގެން، ދިވެހިރާއްޖެއަށް ވަނީ ބީޓީއާރު ޗެމްޕިއަން ސެޓްފިކެޓް ލިބިފައެވެ.
