2025 ވަނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހުގެ ބަޖެޓް ކޮމިޓީން މިއަދު މެންދުރުފަހު ބޭއްވި ބައްދަލުވުމުގައި ފާސްކޮށްފިއެވެ. ސަރުކާރުން ހުށަހެޅި 56.6 ބިލިއަން ރުފިޔާގެ ބަޖެޓް ފާސްކޮށްފައިވަނީ އިތުރު ބަދަލެއް ނުގެނެސް، ނަމަވެސް މަޝްރޫޢުތަކުގެ ތަފްސީލު މަޖިލީހަށް ހުށަހެޅުމަށް ޝަރުތުކޮށްފައެވެ.
ބަޖެޓް ކޮމިޓީގެ ބައްދަލުވުމުގައި ބައިވެރިވި 19 މެންބަރުންގެ ތެރެއިން 15 މެންބަރުންގެ ވޯޓުން ބަޖެޓް ވަނީ ފާސްކޮށްފައެވެ. މި ބައްދަލުވުމުގައި މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޡިމް ވަނީ ބަޖެޓާ ގުޅޭ ގޮތުން މުހިންމު ހުށަހެޅުންތަކެއް ހުށަހަޅުއްވާފައެވެ.
އެގޮތުން، ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް ހުށަހަޅާ މަޝްރޫޢުތައް ވަކި މިންގަނޑުތަކަކަށް ބަލައި ތަރުތީބުކުރުމަށާއި، އަމަލީ މަސައްކަތް ނިންމާނެ މަޝްރޫޢުތަކުގެ ލިސްޓެއް 2025 ވަނަ އަހަރުގެ ފެބްރުއަރީ މަހުގެ ކުރިން މަޖިލީހަށް ހުށަހެޅުމަށް ހުށަހަޅުއްވާފައިވެއެވެ. އަދި ސަރުކާރުން މިހާތަނަށް ހިންގުމަށް ސޮއިކޮށްފައިވާ މަޝްރޫޢުތަކުގެ ތެރެއިން ކުރިއަށްދާނެ އަދި ކުރިއަށް ނުގެންދެވޭނެ މަޝްރޫޢުތަކުގެ މަޢުލޫމާތު 2025 ވަނަ އަހަރުގެ މާރިޗު މަހުގެ ކުރިން ހުށަހެޅުމަށާއި، ކުރިއަށްދާ މަޝްރޫޢުތަކުގެ ޕްރޮގްރެސް ރިޕޯޓެއް ކޮންމެ ކުއާޓަރއެއްގައި މަޖިލީހަށް ހުށަހެޅުމަށްވެސް ހުށަހަޅުއްވާފައިވެއެވެ.
Advertisement
މީގެއިތުރުން 2025 ވަނަ އަހަރުގެ ބަޖެޓުގައި ޖުމްލަ ޚަރަދުގެ ގޮތުގައި 49.2 ބިލިއަން ރުފިޔާ ހިމަނާފައިވާއިރު، އޭގެ ތެރެއިން ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާ އަދި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާ ހިމެނެއެވެ. ޕީއެސްއައިޕީއަށް 12.4 ބިލިއަން ރުފިޔާ ޚަރަދުވާނެ ކަމަށް ލަފާކޮށްފައިވެއެވެ.
ސަރުކާރުން މި ބަޖެޓް ސިފަކުރައްވަނީ ޒިންމާދާރު ބަޖެޓެއްގެ ގޮތުގައެވެ. އެގޮތުން އަންނަ އަހަރަށް ލަފާކުރާ ޑެފިސިޓަކީ 9.4 ބިލިއަން ރުފިޔާ ކަމަށްވާއިރު، މިއީ ފަހުގެ ތާރީޚެއްގައި ނިސްބަތުން އެންމެ ކުޑަ ޑެފިސިޓް ކަމަށް ސަރުކާރުން ފާހަގަކުރައްވައެވެ. ސަރުކާރުގެ އެންމެ ބޮޑު އަމާޒަކީ ކުރިއަށް އޮތް މުއްދަތުގައި ދަރަނި ދެމެހެއްޓެނިވި މިންވަރަކަށް ކުޑަކުރުމެވެ.
