ރައްޔިތުންގެ މަޖިލީހަށް މެންބަރުން އިންތިޚާބުވެވަޑައިގަންނަވާ ޕާޓީ ބަދަލުކުރައްވާނަމަ އެ މެންބަރެއްގެ ގޮނޑި ގެއްލޭގޮތަށް ޤާނޫނު އަސާސީ އިސްލާހުކޮށްފިއެވެ.

ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި އެންޓި ޑިފެކްޝަންގެ އިސްލާހުތަކަށް ބަހުސް ކުރުމަށް ފަހު މުޅި މަޖިލީހުގެ ކޮމިޓީއަށް އެ ބިލް ފޮނުވާފައިވަނީ މިއަދުއެވެ. އަދި ގޮނޑި ގެއްލޭ ގޮތަށް ޤާނޫނު އަސާސީއަށް ހުށަހަޅާފައިވާ އިސްލާހުތަކަށް ރޯލްކޯލް ވޯޓަކުން މިއަދު ވޯޓަށް އަހާފައިވާއިރު ރޯލްކޯލް ވޯޓުގައި ބައިވެރިވި މެންބަރުންގެ ތެރެއިން ބިލް ފާސްކުރަން ފެންނަކަމަށް ވޯޓުދެއްވާފައިވަނީ 75 މެންބަރުންނެވެ. އެއާއެކު އެ ބިލު މުޅި މަޖިލީހުގެ ކޮމިޓީން ފާސްވެފައިވާކަމަށް ނިންމާފައިވާއިރު، އެ އިސްލާހު މަޖިލީހުގެ ތަޅުމުން ފާސްކުރުމަށްޓަކައި މިއަދު ހަވީރު ވަނީ ޖަލްސާއެއް ބާއްވާފައެވެ.

މިއަދު ހަވީރު ބޭއްވި ޖަލްސާގައި ނެގި ވޯޓުގައި އެ ކޮމިޓީ ރިޕޯޓު ފާސްކުރުމަށް ވޯޓު ދެއްވާފައިވަނީ 78 މެންބަރުންނެވެ. އަދި ފާސްކުރަން ނުފެންނަ ކަމަށް ވޯޓު ދެއްވާފައިވަނީ 13 މެންބަރުންނެވެ. މި ޖަލްސާގައި ބައިވެރިވެވަޑައިގެންނެވި ސަރުކާރުގެ ހުރިހާ މެންބަރުންވެސް ވޯޓު ދެއްވާފައިވަނީ ޤާނޫނު އަސާސީއަށް އެ އިސްލާހު ގެންނަން ފެނިވަޑައިގަންނަވާ ކަމަށެވެ.

މި އިސްލާހުގައިވާ ގޮތުން، އަމިއްލަ މެންބަރަކު ޕާޓީއަކާ ގުޅުމުންނާއި، އިންތިޚާބުވި އިރު ހުރި ޕާޓީ ނޫން އެހެން ޕާޓީއަކަށް ބަދަލުވުމުންނާއި، އިންތިޚާބުވި ޕާޓީން އަމިއްލައަށް ވަކިވުން ނުވަތަ އިންތިޚާބުވި ޕާޓީން ވަކިކުރުމުން ވެސް ގޮނޑި ގެއްލޭނެއެވެ.

ސަރުކާރުން މިފަދައިން ޤާނޫނު އިސްލާހުކުރަން އުޅޭތީ އިދިކޮޅު އެމްޑީޕީން މިއަދު ވަނީ މަޖިލިސް ދޮށުގައި އިހުތިޖާޖުވެސް ކޮށްފައެވެ.