ރާއްޖޭގައި ޙަރަކާތްތެރިވާ ނަން މަޝްހޫރު ބޮޑެތި ހުރިހާ ގޭންގުތަކެއް ހުއްޓުވުމުގެ ޤާބިލުކަމާއި ހިތްވަރު މި ސަރުކާރުގައި އެބަހުރި ކަމަށް ދާޚިލީ ސަލާމަތާއި ފަންނިއްޔާތާާބެހޭ ވަޒީރު ޢަލީ އިހުސާން ވިދާޅުވެއްޖެއެވެ. ސަރުކާރަށް އެއް އަހަރު ފުރުން ފާހަގަކުރުމުގެ ގޮތުން ދައުލަތުގެ މީޑިއާއިން ކުރިއަށްގެންދާ ޚާއްޞަ އިންޓަވިއުއެއްގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ރާއްޖޭގައި އުޅޭ ބޮޑެތި ހުރިހާ ގޭންގުތައް ހުއްޓުވާނެ ކަމުގެ ހިތްވަރު މިހާރުގެ ރައީސްގެ ކިބައިގައި ހުރިކަމުގެ 100 އިންސައްތަ ޔަޤީންކަން އެބަ އޮތް ކަމަށެވެ.

ޤާނޫނުތައް ތަންފީޒުކުރުމަށް މިހާރުގެ ސަރުކާރުން ގެންގުޅޭ ތަޞައްވުރު ނިމިދިޔަ ސަރުކާރުތަކުން ވެސް ގެންގުޅުނު ނަމަ ގޭންގުތަކުގެ ބިރުވެރިކަން މިހާރު އޮތް ވަރަށް ބޮޑު ނުވާނެ ކަމަށާއި، ރައީސްގެ ކޮންމެ ނިންމެވުމެއް ފުރިހަމައަށް ތަންފީޛުކުރުމަށް ހޯމް މިނިސްޓްރީންނާއި ދިވެހި ފުލުހުން އަބަދުވެސް ތިބޭނީ ތައްޔާރަށް ކަމަށް މިނިސްޓަރު އިހްސާން ވިދާޅުވިއެވެ.

ގޭންގު ނުރައްކާ މިހާ ބޮޑުވެފައިވަނީ ކުރީގެ ސަރުކާރުތަކުން އެފަދަ ފަރާތްތަކަށް އެއްބާރުލުމާއި ބާރުވެރިކަން ދިނުމުގެ ސަބަބުންކަން ފާހަގަކުރައްވަމުން މިނިސްޓަރު ވިދާޅުވީ މިހާރަކަށް އައިސް ކުށުގެ މާހައުލުގައި 12، 13 އަހަރުގެ ކުދިން ހަރަކާތްތެރިވަމުން އަންނަ ކަމަށެވެ. މި ކަންކަމަށް ހައްލެއް ހޯދުމުގެ ގޮތުން، ޖިނާއީ ކުށުގެ ޒިންމާ ނަގަންޖެހޭ އުމުރު 12 އަހަރަށް ތިރިކުރުމަށް ކެބިނެޓުން ނިންމައި، އެ އިޞްލާޙު މިހާރު ޑްރާފްޓްކޮށް އޭޖީ އޮފީހަށް ފޮނުވުމުގެ ތައްޔާރީތައް ވަމުން އަންނަ ކަމަށް މިނިސްޓަރު އިހްސާން ވިދާޅުވިއެވެ. މި ފިޔަވަޅުތަކުގެ ސަބަބުން ކުށްކުރުން މަދުކޮށް، މުޖުތަމަޢުގެ ރައްކާތެރިކަން އިތުރުކުރެވޭނެ ކަމަށް ސަރުކާރުން އުންމީދުކުރާ ކަމަށް މިނިސްޓަރު އިހްސާން ވިދާޅުވިއެވެ.

މިނިސްޓަރުގެ އިތުރަށް ފާހަގަކުރެއްވި ގޮތުގައި، ގޭންގު ހަރަކާތްތައް ހުއްޓުވުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާ ކަމަށާއި، މީގެ ތެރޭގައި ފުލުހުންގެ ޤާބިލުކަން އިތުރުކުރުމާއި، ޒަމާނީ ވަސީލަތްތައް ތަޢާރަފުކުރުން ހިމެނެއެވެ. އަދި މުޖުތަމަޢުގެ ހޭލުންތެރިކަން އިތުރުކޮށް، ޒުވާނުންނަށް ރަނގަޅު ފުރުޞަތުތައް ހޯދައިދިނުމަށްވެސް އިސްކަންދޭ ކަމަށް ވިދާޅުވިއެވެ.

ސަރުކާރުގެ އަމާޒަކީ ރާއްޖެ ގޭންގު ޙަރަކާތްތަކުން މުޅިން ސަލާމަތްކުރުން ކަމަށާއި މިއީ ދުވަހުން ދުވަހަށް ކުރެވޭނެ ކަމެއް ނޫން ނަމަވެސް ސަރުކާރުގެ މަސައްކަތްތަކުގެ ނަތީޖާ ފެންނަމުންދާކަން މިނިސްޓަރު ފާހަގަ ކުރެއްވިއެވެ.

މީގެއިތުރުން، ގޭންގު ހަރަކާތްތަކުގައި ބައިވެރިވާ ފަރާތްތަކަށް އަމާޒުކޮށްގެން ހިންގޭ އިޞްލާޙީ ޕްރޮގްރާމްތަކުގެ ވާހަކަވެސް މިނިސްޓަރު ދެއްކެވިއެވެ. މި ޕްރޮގްރާމްތަކުގެ މަޤްޞަދަކީ އެފަދަ ފަރާތްތައް އަނބުރާ މުޖުތަމަޢަށް ގެނައުމާއި، އެމީހުންނަށް އާ ފުރުޞަތުތަކެއް ހޯދައިދިނުން ކަމަށް ވިދާޅުވިއެވެ.

މިނިސްޓަރު އިހްސާން ވިދާޅުވީ، ގޭންގު ހަރަކާތްތައް ހުއްޓުވުމަކީ ސަރުކާރުގެ އެންމެ އިސް އަމާޒުތަކުގެ ތެރެއިން އެއް އަމާޒު ކަމަށާއި، މި މަސައްކަތުގައި ހުރިހާ ދިވެހި ރައްޔިތުންގެ އެއްބާރުލުން ބޭނުންވާ ކަމަށެވެ. އަދި މި މަސައްކަތުގައި ކާމިޔާބު ހޯދޭނެ ކަމުގެ ފުރިހަމަ ޔަޤީންކަން އޮތް ކަމަށްވެސް މިނިސްޓަރު ވިދާޅުވިއެވެ.