ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލޭނެ ޙާލަތުތައް ޤާނޫނު އަސާސީގައި ހިމެނުމަށް ބިލެއް ހުށަހެޅުމަށް ވެރިކަން ކުރާ ޕާޓީ، ޕީޕަލްސް ނެޝަނަލް ކޮންގްރެސް (ޕީއެންސީ) އިން ނިންމައިފިއެވެ.

ކުރީގެ އެމްޑީޕީގެ މެޖޯރިޓީ އޮތް މަޖިލީހުން ވެސް ގޮނޑި ގެއްލޭގޮތަށް ފާސްކުރި ބިލު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބިލު ތަސްދީޤު ކުރެއްވި ނަމަވެސް، މި "އެންޓި ޑިފެކްޝަން" ޤާނޫނުގައި ބާގަނޑުތަކެއް ހުރި ކަމަށާއި، އަދި މި ޤާނޫނުގެ ބައެއް މާއްދާތައް ޤާނޫނު އަސާސީއާ ފުށުއަރާ ކަމަށް ޤާނޫނީ ވަކީލުން ފާހަގަކޮށްފައިވެއެވެ.

މިހާރު އޮތް ޤާނޫނުގައިވާ، ޕާޓީ ބަދަލުކުރުމުން ގޮނޑި ގެއްލޭ ގޮތަށް އޮތް މާއްދާތައް އުވާލުމަށް އެދި އަމިއްލަ ފަރާތަކުން ހައިކޯޓަށް މައްސަލައެއް ހުށަހަޅާފައިވާކަން ވެސް ފާހަގަކުރެވެއެވެ.

މި ހުރިހާ ކަމަކަށް ރިޢާޔަތްކޮށް، ޕީއެންސީން ވަނީ އެންޓި ޑިފެކްޝަން ޤާނޫނުގައި ބަޔާންކޮށްފައިވާ ގޮތަށް، ޤާނޫނު އަސާސީގައި ވެސް ގޮނޑި ގެއްލޭނެ ޙާލަތުތައް ހިމެނުމަށް ބިލެއް ތައްޔާރުކޮށްފައެވެ. މި ބިލު ހުށަހެޅުމަށް ޕީއެންސީގެ ޕާލަމެންޓަރީ ގްރޫޕުން ވެސް ވަނީ ފާސްކޮށްފައެވެ.

ޕީއެންސީން ތައްޔާރުކޮށްފައިވާ ބިލުގައި، މަޖިލިސް މެންބަރުން މަޤާމުން ވަކިވާނެ ހަތަރު ޙާލަތެއް ބަޔާންކޮށްފައިވެއެވެ. އެއީ:

1. އަމިއްލަ މެންބަރަކު ޕާޓީއަކާ ގުޅުން
2. އިންތިޚާބުވި އިރު ހުރި ޕާޓީ ނޫން އެހެން ޕާޓީއަކަށް ބަދަލުވުން
3. އިންތިޚާބުވި ޕާޓީން އަމިއްލައަށް ވަކިވުން
4. އިންތިޚާބުވި ޕާޓީން ވަކިކުރުން

މި ބިލު ހުށަހެޅުމުން، މަޖިލިސް މެންބަރުންގެ ގޮނޑި ގެއްލުމާ ގުޅޭ މައްސަލައިގައި އާ ބަހުސްތަކެއް ކުރިއަށްދާނެއެވެ.