އިދިކޮޅު އެމްޑީޕީން ޙަޤީޤަތް އޮޅޭ ގޮތަށް މަޢުލޫމާތު ފަތުރާ ކަމަށް ބުނެ އެކަން ވެރިކަން ކުރާ ޕާޓީ، ޕީއެންސީން ކުށްވެރިކޮށް، މިރޭ ބަޔާނެއް ނެރެފިއެވެ..

ޕީއެންސީގެ ބަޔާނުގައި ބުނީ، ފާއިތުވި އެއް އަހަރު ދުވަހު ރައީސް ޑރ. މުޙައްމަދު މުޢިޒުގެ ވެރިކަމުގައި ސަރުކާރު ހިންގާފައިވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިވުމާއެކު ހާމަކަން ބޮޑު ގޮތެއްގައި ރައްޔިތުންނަށް ހުރިހާ މަޢުލޫމާތެއް ފޯރުކޮށްދީގެން ކަމަށެވެ.

ޕީއެންސީން ބުނިގޮތުގައި ފާއިތުވި ތިންއަހަރު ދައުލަތުގެ ޚަރަދުތައް އެވްރެޖްކޮށް 15 ޕަސަންޓް އިތުރުވަމުން ދިޔަ ނަމަވެސް މި އަހަރު ދައުލަތުގެ ޚަރަދުތައް އިތުރުވެފައިވަނީ އެންމެ 2.5 ޕަސަންޓަށެވެ. މީގެ ނަތީޖާއެއްގެ ގޮތުން ބަޖެޓުގެ ޑެފިސިޓު 378 މިލިއަން ރުފިޔާއިން ކުޑަކުރެވި 3.6 އިންސައްތަ ދަށް ކުރެވިފައިވާ ކަމަށް ވެސް ޕީއެންސީން ބުންޏެވެ.

މީގެ އިތުރުން، ކުރީ ސަރުކާރުން ބޭރުގެ ފަރާތްތަކުގެ އެހީގައި ހިންގި މަޝްރޫއުތަކުގެ ޚަރަދުތައް ރިކޯޑް ނުކޮށް މި އަހަރުގެ ޚަރަދުތަކުގެ ތެރޭގައި ހިމެނުމުން ކުރިމަތިވި މައްސަލަތައް ހައްލު ކުރުމަށް ފަހު މިހާރު ކޮންމެ ހަފްތާއަކު ޚަރަދާއި އާމްދަނީގެ ތަފްޞީލްތައް އާންމުކުރަމުން އަންނަ ކަމަށް ވެސް ޕީއެންސީން ފާހަގަކުރިއެވެ.

ޕީއެންސީން އިތުރަށް ބުނީ، ރައީސް އޮފީހަށް ހުށަހެޅި ހުރިހާ އާރުޓީއައިތަކަށް ޖަވާބުދީފައިވާ ކަމަށާއި، މިނިސްޓްރީތަކުގެ އާރުޓީއައިތަކަށް ވެސް ޖަވާބު ދެމުން އަންނަ ކަމަށެވެ. އަދި ފާއިތުވި އަހަރުގެ ތެރޭގައި 70 އަށްވުރެ ގިނަ ނޫސްވެރިންގެ ބައްދަލުވުން ބާއްވައި، 700 އަށްވުރެ ގިނަ ފަހަރު މިނިސްޓަރުން އެކިއެކި މީޑިއާތަކަށް މައުލޫމާތު ދީފައިވާ ކަމަށް ވެސް ޕީއެންސީން ބުންޏެވެ.

ޕީއެންސީން ފާހަގަކުރިގޮތުގައި ރާއްޖޭގެ ތާރީހުގައި ފުރަތަމަ ފަހަރަށް ކެބިނެޓުން ނިންމާ ނިންމުންތައް އާންމުންނަށް ފެންނާނެހެން އާންމުކުރަން ފަށާފައިވަނީ މި ސަރުކާރުން ކަމަށެވެ. އަދި މި އަހަރުގެ މާޗުން ފެށިގެން ކެބިނެޓުގެ ކޮންމެ ނިންމުމެއް އަދާހަމަކޮށް ޝާއިއުކުރަމުން އަންނަ ކަމަށް ވެސް ޕީއެންސީން ފާހަގަކުރިއެވެ.