އައިޖީއެމްއެޗްގެ ނަރުހެއް ކަމުގައިވާ ފިލިޕީންސްގެ މޭރީ ގްރޭސް މަރާލި މައްސަލައިގައި ތުހުމަތުކުރެވޭ ހަލީމަތު ލަމްހާ ބަންދުން ދޫކޮށްލުމަށް ކްރިމިނަލް ކޯޓުން ނިންމި ނިންމުން ހައިކޯޓުގައި އިސްތިއުނާފުކޮށްފިއެވެ.
މި މައްސަލަ ހައިކޯޓަށް ހުށަހެޅީ ފާއިތުވި ހަފުތާގައި ކަމަށާއި، ނަމަވެސް މައްސަލަ ބަލައިގަތުމާމެދު އަދި ވަކި ގޮތެއް ނިންމާފައިނުވާ ކަމަށް މަޢުލޫމާތު ލިބިފައިވެއެވެ.
ކްރިމިނަލް ކޯޓުން ލަމްހާ ދޫކޮށްލާފައިވަނީ ވަކި ޝަރުޠު ތަކަކާއިއެކު ތިންމަސްދުވަހުގެ މުއްދަތަށެވެ. މިއީ ލަމްހާ ބަންދުން ދޫކޮށްލެވުނު ފުރަތަމަ ފަހަރެއް ނޫނެވެ. މީގެ ކުރިން 2022 ވަނަ އަހަރުގެ ނޮވެމްބަރު މަހު ވެސް އޭނާ ބަންދުން ދޫކޮށްލިއެވެ. އެފަހަރު ވެސް ދައުލަތުން ވަނީ އެ ނިންމުން އިސްތިއުނާފް ކޮށްފައެވެ. އެއާއިއެކު ހައިކޯޓުން ޑިސެމްބަރު މަހު ލަމްހާ އަލުން ބަންދު ކުރިއެވެ.
Advertisement
މޭރީ ގްރޭސް މަރައިލީ 2021 ވަނަ އަހަރުގެ އޮކްޓޯބަރު 19 ވަނަ ދުވަހުއެވެ. މި މައްސަލައިގައި ދަޢުވާ ކުރަނީ މޭރީގެ ފިރިމީހާ މާވިން އެސްވައި ވާގަސް އާއި ހަލީމަތު ލަމްހާގެ މައްޗަށެވެ. މާވިންގެ މައްޗަށް ދަޢުވާ ކުރަނީ ގަސްތުގައި މީހަކު މަރާލުމުގެ ކުށުގެ ދަޢުވާއެވެ. އަދި ލަމްހާގެ މައްޗަށް ކުރަނީ މީހަކު މަރާލުމުގައި ބައިވެރިވުމުގެ ކުށުގެ ދަޢުވާއާއި، ހުއްދަ ނުނަގައި ކުރަންޖެހޭ ކަމެއް ކުރުމުގެ ކުށުގެ ދަޢުވާގެ އިތުރުން އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދަޢުވާއެވެ.
