ހަށިގަނޑުގައި ޑަކްޓޭޕް ތަތްކޮށްގެން ގިނަ އަދަދެއްގެ މަސްތުވާތަކެތި އެތެރެކުރަން އުޅުނު 26 އަހަރުގެ ދިވެހި ޒުވާނެއްގެ މައްޗަށް ދެ ދައުވާއެއް ސާބިތުވެ، އޭނާ 50 އަހަރަށް ޖަލަށް ލުމާއެކު ދެ ލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފި އެވެ.
މި މައްސަލައިގައި ކުށް ސާބިތުވެ ބޮޑު ހުކުމެއް އައިސްފައިވަނީ ށ. ނޫމަރާ، ހަވީރީގެ، އަބްދުﷲ ފަސީހުގެ މައްޗަށެވެ.
ފަސީހު އަތުލައިގެންފައިވަނީ މިދިޔަ އަހަރުގެ އޮކްޓޫބަރު 7 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން ގއ. ކޫއްޑޫއަށް ފުރަން ގޮސް އުޅެނިކޮށެވެ. އޭނާގެ ހަށިގަނޑު ޗެކްކުރިއިރު ދެ ފައިގެ ފަލަމަސްގަނޑުގައި ޑަކްޓޭޕް އަޅައިގެން ފޮރުވާފައި ހުރި ގިނަ އަދަދެއްގެ މަސްތުވާތަކެތި ވަނީ ފެނިފަ އެވެ.
Advertisement
ކްރިމިނަލް ކޯޓުގައި މި މައްސަލަ ބެއްލެވި ގާޒީ އަލީ ނަދީމް ކުރެއްވި ހުކުމުގައި، ފަސީހުގެ މައްޗަށް އުފުލި ދެ ދައުވާގެ ތަފްސީލާއި އަދަބުތައް ކަނޑައަޅުއްވާފައިވަނީ ތިރީގައިވާ ގޮތަށެވެ:
- ޑައިމޯފިން ޓްރެފިކްކުރުމުގެ ކުށް: ފަސީހުގެ ހަށިގަނޑުން 23.5976 ގްރާމްގެ ޑައިމޯފިން ފެނުނު މައްސަލައިގައި 25 އަހަރުގެ ޖަލު ހުކުމަކާއި އެއްލައްކަ ރުފިޔާގެ ޖޫރިމަނާއެއް ވަނީ ކޮށްފައެވެ. ބަންދުގައި ހޭދަކުރި މުއްދަތު އުނިކުރުމުން މި ބައިން ތަންފީޒުކުރަން ޖެހެނީ 24 އަހަރާއި 4 މަހާއި 3 ދުވަހުގެ ޖަލު ބަންދެކެވެ.
- ކެނެބިސް ޓްރެފިކްކުރުމުގެ ކުށް: އޭނާގެ އަތުން ފެނުނު 10 ފިލްމު ދަޅުގައި ހުރި 252.1652 ގްރާމްގެ ކެނެބިސް ފެނުނު މައްސަލައިގައިވެސް 25 އަހަރުގެ ޖަލު ހުކުމަކާއި އެއްލައްކަ ރުފިޔާގެ ޖޫރިމަނާއެއް ވަނީ ކަނޑައަޅާފަ އެވެ.
ދެ މައްސަލައިގެ ޖޫރިމަނާ ފައިސާގެ ގޮތުގައި ދައްކަންޖެހޭ ޖުމްލަ 200,000 ރުފިޔާ، ހުކުމް ކުރި ތާރީހުން ފެށިގެން އެއް އަހަރު ދުވަހުގެ ތެރޭގައި މީރާއަށް ދައްކައި ހަލާސްކުރުމަށް ކޯޓުން ވަނީ އަމުރުކޮށްފަ އެވެ.
ޝަރީއަތުގައި ފަސީހުގެ ދިފާއުން ބުނެފައިވަނީ އޭނާއަކީ ހިއުމަން ޓްރެފިކިންގެ ޝިކާރައަކަށްވެ، ބަޔަކު މަޖުބޫރުކުރުވައިގެން އެކަން ކުރި މީހެއް ކަމަށެވެ. ނަމަވެސް އެކަން ކަށަވަރުކޮށްދެވޭނެ އެއްވެސް ހެއްކެއް ދިފާއަށް ދެއްކިފައެއް ނުވެ އެވެ. އަދި ތަހުގީގުގައި ހަނުހުރުމުގެ ހައްގު ބޭނުންކޮށްފައިވާތީ، ޝަރީއަތުން ނިންމެވީ އެ ދިފާއަކީ ބުރަދަނެއް ހުރި ވާހަކައެއް ނޫން ކަމަށެވެ.
ދައުލަތުން ހުށަހެޅި ހެކި ގަރީނާތަކުގެ މައްޗަށް ބިނާކޮށް، އެކަށީގެންވާ ޝައްކެއް ނެތް މިންވަރަށް ކުށް ސާބިތުވާ ކަމަށް ކަނޑައަޅައި ކޯޓުން ވަނީ އޭނާގެ މައްޗަށް ޖުމްލަ 50 އަހަރުގެ ޖަލު އަދަބެއް ކަނޑައަޅާފަ އެވެ.
