ވާނުވާ ބަންދުގައި ތިބޭ މީހުންގެ އަދަދު މަދު ޤައުމަކަށް ދިވެހި ރާއްޖެ ހަދަން، މިދިޔަ އާދިއްތަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި، ނިންމަވައިފިއެވެ.
ޝަރީއަތުގެ މަރުހަލާ ނިމެންދެން ބަންދުގައި ތިބެންޖެހޭ މީހުން ގިނަވެފައި ވާތީވެ މިކަމަށް ހައްލެއް ހޯދައިދެއްވާނެކަމަށް ރައީސުލް ޖުމްހޫރިއްޔާ ޑރ، މުޙައްމަދު މުޢިއްޒު، ވަނީ މީގެ ކުރިން ވެސް ވިދާޅުވެފައެވެ.
ޝަރީއަތުގެ މަރުހަލާ ނިމެންދެން ބަންދުގައި ތިބޭ މީހުން ނުވަތަ ވާނުވާ ބަންދުގައި ތިބޭ މީހުންގެ އަދަދު އިތުރުވުމަކީ އެކި ގައުމުތަކުގެ ކަންބޮޑުވުން އޮންނަކަމެކެވެ. ރައީސުލް ޖުމްހޫރިއްޔާވަނީ ވެރިކަމާ ހަވާލުވެވަޑައިގެންނެވި ފަހުން ވާނުވާ ބަންދުގައި ތިބި މީހުން ގެ މައްސަލަތަކަށް ހައްލު ހޯދުމަށް ގިނަ ބަދަލުތަކެއް ގެންނަވާފައިއެވެ. އަދި ޝަރުއީ ދާއިރާއަށް ސަރުކާރުތަކުން މިހާތަނަށް ނުފޫޒު ފޯރުވަމުން އައި އައުންވެސް ވަނީ ހުއްޓުމަކަށް ގެނެސްފައި ކަމަށް އެމަނިކުފާނު ވިދާޅުވިއެވެ.
Advertisement
މީގެ އިތުރުން، އެއް އަހަރަށް ވުރެ ގިނަދުވަސްވެފައިވާ ވާނުވާ ބަންދުގެ މައްސަލަތައް ވަކި ގޮތަކަށް ނިންމުމަށްޓަކައި ބަންޑާރަނައިބުގެ އޮފީހުން އަދާކުރަންޖެހޭ އެންމެހައި މަސްއޫލިއްޔަތުތައް އެންމެ ފުރިހަމައަށް އަދާކުރައްވާނެ ކަމުގެ ޔަޤީންކަންވެސް ރައީސް ދެއްވާފައެވެ. އަދި ބަންދުގައި ތިބޭ މީހުންގެ މައްސަލަތަކަށް އިންސާފުވެރި ހައްލެއް ހޯއްދަވައިދެއްވުމަށް ސަރުކާރުން ހާއްސަ އިސްކަމެއް ދެއްވައިގެން މަސައްކަތް ކުރައްވާނެ ކަމަށްވެސް އެމަނިކުފާނު ވަނީ އެކި މަންސަތަކުގައި ވިދާޅުވެފައެވެ.
ވާނުވާ ބަނދުތައް ކުރިއަށް ނުގޮސް ގިނަ ދުވަސްވާން މެދުވެރިވާ މައިގަނޑު ސަބަބެއްގެ ގޮތުގައި ޝަރުއީ ދާއިރާއިން ފާހަގަކުރައްވާ ކަމަކީ ކޯޓުތަކުގެ، ވަކިން ހާއްސަކޮށް ކްރިމިނަލް ކޯޓުގެ ޖާގައިގެ ދަތިކަމެވެ. އެކަމަށް ހައްލެއް ހޯދުމުގެ ގޮތުން ހުޅުމާލޭގައި ޖަސްޓިސް ބިލްޑިންގް އެންކްސް ހުޅުވާ، ކްރިމިނަލް ކޯޓުގެ މަސައްކަތް އެ އިމާރާތައް ސަރުކާރުން ވަނީ ބަދަލުކޮށްފައެވެ.
