އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު މުނޫ މަހާވަރު، ހދ. ހަނިމާދޫ އާއި ހއ. ތުރާކުނަށް ޒިޔާރަތް ކުރައްވައިފިއެވެ.

މި ދަތުރަކީ ހަނިމާދޫގައި ކުރިއަށްދާ އެއަރޕޯޓު ތަރައްޤީކުރުމުގެ މަޝްރޫޢު ހިނގަމުންދާ ގޮތް ބެއްލެވުމަށް ކުރެއްވި ދަތުރެކެވެ.

ދަތުރުގެ ތެރޭގައި ސަފީރު ވަނީ ހަނިމާދޫ އަދި ތުރާކުނު ކައުންސިލްގެ މެންބަރުންނާ ބައްދަލުކުރައްވާފައެވެ. އަދި ހަނިމާދޫ ސްކޫލާއި ތުރާކުނު ސްކޫލަށް ފޮތާއި ކޮމްޕިއުޓަރު ވަނީ ހަދިޔާކުރައްވާފައެވެ. ސަފީރުގެ ޒިޔާރަތަށް ދެ ރަށުން ވެސް ވަރަށް ހޫނު މަރުޙަބާއެއް ކިޔާފައިވާކަން ފާހަގަކުރެވެއެވެ.

ހަނިމާދޫ އެއަރޕޯޓު ތަރައްޤީކުރުމުގެ މަޝްރޫޢުގެ ދަށުން 2,460 މީޓަރުގެ އައު ރަންވޭއަކާއި، އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޓަރމިނަލެއް ޢިމާރާތްކުރެވޭނެއެވެ. މީގެ އިތުރުން، ބައިނަލްއަޤްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައް ޤާއިމުކުރެވޭނެއެވެ.

މި މަޝްރޫޢު ނިމުމުން، އެއަރބަސް A320 އާއި ބޯއިންގ 737 ފަދަ ބޮޑެތި މަތިންދާބޯޓުތަކަށް ހަނިމާދޫ އެއަރޕޯޓުން ޚިދުމަތް ދެވޭނެއެވެ. އަދި މެދު އިރުމަތި، ދެކުނު އޭޝިއާ، ދެކުނު އިރުމަތީ އޭޝިއާ އަދި އިރުމަތީ އެފްރިކާގެ ޤައުމުތަކުން ސީދާ ފްލައިޓްތައް ހަނިމާދޫއަށް އޮޕަރޭޓްކުރުމުގެ ޤާބިލުކަން ލިބިގެންދާނެއެވެ.

މި މަޝްރޫޢަކީ އިންޑިއާގެ އެގްޒިމް ބޭންކުގެ ލޯނު އެހީގައި ކުރިއަށްގެންދާ މަޝްރޫޢެކެވެ. ސަރުކާރުން ބުނެފައިވަނީ މި މަޝްރޫޢު އަންނަ މާރިޗު މަހު ނިމޭނެ ކަމަށް ލަފާކުރެވޭ ކަމަށެވެ. މިދިޔަ ސެޕްޓެންބަރު 19 ގެ ނިޔަލަށް މަޝްރޫޢުގެ %69 މަސައްކަތް ވަނީ ނިމިފައެވެ.