ޙައްޖު ކޯޕަރޭޝަނުން ދަރަނި އަދާކޮށް، ފައިދާ ހޯދުމަށް އާ މަސައްކަތްތަކެއް ފަށާފައިވާ ކަަމަށް އެ ކޯޕަރޭޝަންގެ މެނޭޖިންގ ޑިރެކްޓަރު މުހައްމަދު ޝަކީލް ވިދާޅުވެއްޖެއެވެ.

ޝަކީލް މިހެން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް 1 އަހަރު ފުރުމާ ގުޅިގެން ދައުލަތުގެ މީޑިއާން ގެނެސްދިން "ހަފްތާ 52" ޕްރޮގްރާމުގައި ވާހަކަދައްކަވަމުންނެވެ.

ޝަކީލް ވިދާޅުވި ގޮތުގައި، ޙައްޖު ކޯޕަރޭޝަން އުފެދުނީއްސުރެ ކުންފުނީގެ ތަރައްޤީއަށް އެއްވެސް މަސައްކަތެއް ކޮށްފައިނުވާއިރު، ފާއިތުވި އަހަރުތަކުގައި އެ ކޯޕަރޭޝަން ހިންގަމުން އައީ ޙައްޖު އުމްރާ ގްރޫޕެއްގެ ގޮތުގައެވެ. އަދި ވޭތުވެދިޔަ 11 އަހަރު 168 މިލިއަން ރުފިޔާގެ ދަރަނި އޮތްކަމަށްވެސް ޝަކީލް ހާމަކުރެއްވިއެވެ.

"މި ދައުރުގެ ތެރޭގައި ދަރަނިތައް ދައްކާ ޚަލާސްކޮށް ކުންފުންޏަކީ ފައިދާ ލިބޭ ކުންފުންޏަކަށް ހެދުމުގެ މަސައްކަތް ކުރަމުންދަނީ." ޝަކީލް ވިދާޅުވިއެވެ.

މި މަޤްޞަދު ޙާޞިލުކުރުމަށް، ޙައްޖު ކޯޕަރޭޝަނުން ވަނީ ރިއަލް އެސްޓޭޓް ވިޔަފާރިއަށް ވަނުމަށް ނިންމާފައެވެ. މިގޮތުން ހުޅުމާލޭގައި ރެޒިޑެންޝަލް ޢިމާރާތެއް ތަރައްޤީކުރުމަށް ހަމަޖެހިފައިވާއިރު، އެ ޢިމާރާތުގެ އެޕާޓްމަންޓްތައް ވިއްކާ ނިމުމުން ކުންފުނީގެ ދަރަނީގެ ބޮޑު ބައެއް ދެއްކޭނެކަމަށް ޝަކީލް ވިދާޅުވިއެވެ.

މީގެ އިތުރުން، ރިއަލް އެސްޓޭޓް ދާއިރާ ނޫން އެހެން ދާއިރާތަކުންވެސް އިންވެސްޓު ކުރުމަށް މަސައްކަތް ކުރަމުންދާކަމަށްވެސް ޝަކީލް ހާމަކުރެއްވިއެވެ.

ޝަކީލް އިތުރަށް ވިދާޅުވީ، މި މަސައްކަތްތަކުގެ ނަތީޖާއެއްގެ ގޮތުން، ވޭތުވެދިޔަ ކުރު މުއްދަތުގެ ތެރޭގައި ޙައްޖު ކޯޕަރޭޝަނަށް ރައްޔިތުންގެ އިތުބާރު ލިބި، ޙައްޖާއި އުމްރާއަށް ދާން ފައިސާ ދައްކާ މީހުންގެ ޢަދަދު މިދިޔަ އަހަރެއްހާ ދުވަހުގެ ތެރޭގައި އިތުރުވެފައިވާ ކަމަށެވެ.

ޙައްޖު ކޯޕަރޭޝަންގެ މި މަސައްކަތްތަކާއެކު، ކުރިއަށް އޮތް ތަނުގައި ކުންފުނީގެ މާލީ ޙާލަތު ރަނގަޅުވެ، ޙައްޖާއި އުމްރާގެ ޚިދުމަތްތައް އިތުރަށް ފުޅާކުރެވޭނެކަމަށް އުއްމީދު ކުރައްވާކަމަށް ޝަކީލް ވިދާޅުވިއެވެ.