ދިވެހި ހައްޖުވެރިންނަށް މައްކާ ރޫޓް އިފްތިތާހުކުރުމުގެ ތާރީޚީ ޖަލްސާއަށް ސައުދީ އަރަބިއްޔާއިން ވަޑައިގަންނަވާ ވަފުދު މިއަދު ރާއްޖެ އައުމަށް ހަމަޖެހިފައިވާ ކަމަށް އިސްލާމިކް މިނިސްޓްރީން މަޢުލޫމާތު ދެއްވައިފިއެވެ.

އިސްލާމިކް މިނިސްޓަރު، ޑރ. މުހައްމަދު ޝަހީމް އަލީ ސައީދު ވިދާޅުވި ގޮތުގައި، މި ޖަލްސާގައި ބައިވެރިވެ ވަޑައިގަތުމަށް ސައޫދީގެ ހައްޖު މިނިސްޓްރީ، ފޮރިން މިނިސްޓްރީ އަދި އިމިގްރޭޝަނުން މަތީފެންވަރުގެ 42 ބޭފުޅަކު ވަޑައިގަންނަވާނެއެވެ. މި ވަފުދުގެ އިސްކޮށް ވަޑައިގަންނަވަނީ މައްކާ ރޫޓް އިނިޝިއޭޓިވް ކޮމިޓީގެ ޗެއާމަން އަދި ސައޫދީ ދާޚިލީ ވަޒީރުގެ އެޑްވައިޒަރު ލެފްޓިނެންޓް ޖެނެރަލް ހިޒް އެކްސެލެންސީ ސުލައިމާން ބިން އަބްދުލްއަޒީޒު އަލްޔަހްޔާއެވެ.

މި މަހުގެ 26 ވާ ހޯމަ ދުވަހު ބޭއްވުމަށް ހަމަޖެހިފައިވާ މައްކާ ރޫޓް އިނިޝިއޭޓިވް އިފްތިތާހުކޮށް ދެއްވާނީ ރައީސުލްޖުމްހޫރިއްޔާ މުޙައްމަދު މުޢިއްޒު އެވެ.

ރަސްގެފާނު ސަލްމާންގެ ޚާއްޞަ އިރުޝާދުގެ ދަށުން ކުރިއަށްދާ މައްކާ ރޫޓްގައި ރާއްޖެ ހިމެނުއްވީ މިކަމުގައި ޤައުމުތަކަށް ކަނޑައަޅާފައި އޮންނަ ހުރިހާ ޝަރުތުތަކުން ރާއްޖެ އިސްތިސްނާކޮށް ޚާއްޞަކަން ދެވިގެންނެވެ.

މައްކާ ރޫޓްގެ ދަށުން ދިވެހި ހައްޖުވެރިންނަށް ލިބިގެންދާނެ ފަސޭހަތަކުގެ ތެރޭގައި، ޖިއްދާ އެއަރޕޯޓުގައި އެރައިވަލްގައި ޕާސްޕޯޓް ސްޓޭމްޕް ޖެހުމަށާއި ލަގެޖް ނެގުމަށް މަޑުކުރަން ނުޖެހުން ހިމެނެއެވެ. މީގެ އިތުރުން، މަތިންދާބޯޓުން ފައިބާ ގޮތަށް ސީދާ ހޮޓަލަށް ދިއުމާއި، ލަގެޖް ވެސް ހޮޓަލުން ލިބޭނެ ކަމަށް އިސްލާމިކް މިނިސްޓްރީން މަޢުލޫމާތު ދެއްވާފައިވެއެވެ.