އިސްލާމީ ސިވިލައިޒޭޝަން ފޯރަމް ކޮންމެ ދެ އަހަރުން އެއް އަހަރު ބޭއްވުމަށް ނިންމައިފި

އުޒްބެކިސްތާނުގެ ރައީސް ޝައުކަތު މިރްޒިޔޮޔޭވްގެ އިސްނެންގެވުމަކަށް އެ ޤައުމުގައި ބޭއްވުނު ބައިނަލްއަޤްވާމީ އިސްލާމީ ސިވިލައިޒޭޝަންގެ ފުރަތަމަ ފޯރަމް ކާމިޔާބުކަމާއެކު ނިންމާލައި، މީގެފަހުން މި ފޯރަމް ކޮންމެ ދެ އަހަރުން އެއް އަހަރު ދާއިމީގޮތެއްގައި ބޭއްވުމަށް ބައިވެރިން ނިންމައިފިއެވެ.

ތަޝްކެންދު، ސަމަރުޤަންދު އަދި ތިރްމިޛްގައި ކުރިއަށްދިޔަ މި ބޮޑު ބައްދަލުވުމުގައި އިސްލާމީ ދުނިޔޭގެ މަޝްހޫރު ޢިލްމުވެރިންނާއި، މުފްތީން އަދި ބައިނަލްއަޤްވާމީ ޖަމްޢިއްޔާތަކުގެ މަންދޫބުން ބައިވެރިވެވަޑައިގެންނެވިއެވެ. ރާއްޖޭގެ އިސްލާމިކް މިނިސްޓަރު ޑރ.މުޙައްމަދު ޝަހީމް އަލީ ސައީދު ވެސް ބައިވެރިވެވަޑައިގެންނެވިއެވެ.

މި ފޯރަމް ނިންމާލަމުން އެކުލަވާލި "ތަޝްކެންދު ބަޔާން" ގައި ބަޔާންކޮށްފައިވާ ގޮތުން، މި ހަރަކާތް ދެ އަހަރުން އެއް އަހަރު ބާއްވާ ދާއިމީ މަންސައަކަށް ހެދުމުގެ މައިގަނޑު މަޤްޞަދަކީ އިސްލާމީ ޢިލްމީ އަދި ސަގާފީ ތަރިކަ ރައްކާތެރިކުރުމުގައި ދުނިޔޭގެ ފެންވަރުގައި ގުޅުން ބަދަހިކުރުމެވެ

ޚާއްޞަކޮށް ސުންނަތުގެ އަހުލުވެރިންގެ ބޮޑެތި އިމާމުން ކަމުގައިވާ އިމާމް ބުޚާރީ، އިމާމް މާތުރީދީ އަދި އިމާމް ތިރްމިޛީ ފަދަ ބޭފުޅުންގެ ޢިލްމީ ޚިދުމަތްތައް ދިރުވައި، އަންނަން އޮތް ޖީލުތަކަށް ފޯރުކޮށްދިނުމަށް މި ނިންމުމުގެ ސަބަބުން މަގުފަހިވެގެންދާނެއެވެ

މީގެ އިތުރުން، މި ފޯރަމް މެދުވެރިކޮށް އިސްލާމްދީނާ ގުޅުވައިގެން ފަތުރާ ހަރުކަށި ފިކުރުތަކާއި "އިސްލާމޯފޯބިއާ" އާ ދެކޮޅަށް ބައިނަލްއަޤްވާމީ ފެންވަރެއްގައި ވަކާލާތުކުރުމަށް ބައިވެރިން ފާހަގަކުރިއެވެ. އިސްލާމްދީނަކީ އަމާންކަމުގެ ދީނެއްކަން ދުނިޔެއަށް ސާފުކޮށްދިނުމަށްޓަކައި މިފަދަ ދާއިމީ ބައްދަލުވުމެއްގެ މުހިންމުކަން ބޮޑުކަމަށް ޢިލްމުވެރިން އެއްބަސްވެވަޑައިގަންނަވައެވެ.