މި އަހަރު ހައްޖުގެ މަތިވެރި އަޅުކަމަށް ފުރާ ދިވެހި ހައްޖުވެރިންނަށް ހައްޖާއި ގުޅޭ މުހިންމު ނަސޭހަތްތަކެއް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ރޭ ދެއްވައިފި އެވެ.
މި އަހަރު ރާއްޖެއިން ހައްޖުގެ އަޅުކަމަށް މައްކާއަށް ފުރާ މީހުންގެ ފުރަތަމަ ފްލައިޓުގެ ހައްޖުވެރިންނާއި ބައްދަލުކުރައްވައި ޝަހީމް ވިދާޅުވީ ހައްޖު ދަތުރަކީ ކޮންމެ މީހެއްގެ ހަޔާތުގައި ވެސް ކުރާނެ އެންމެ މާތް, އެންމެ މުގައްދަސް ދަތުރު ކަމަށާއި ކައުބަތުﷲ ގެފުޅަށް ޒިޔާރަތްކުރުމުގެ ނިއުމަތަކީ މާތް ﷲ އިންސާނާއަށް ދެއްވާނެ އެންމެ މަތިވެރި އެއް ނިއުމަތް ކަމަށެވެ. މައްކާއަށް ގޮސް ކުރާ ހުރިހާ އަޅުކަމެއް ގަބޫލުކުރައްވާތޯ މާތްﷲ ގެ ހަޟްރަތުގައި ދުއާ ދަންނަވަން ޖެހޭނެ ކަމަށް ޝަހީމް ވިދާޅުވި އެވެ.
އިންސާނާގެ އަމަލުތައް ގަބޫލުކުރެވޭނީ ދެ ޝަރުތެއް ފުރިހަމަވުމުން ކަމަށާއި އެއީ ކުރާ އަމަލަކީ ﷲއަށްޓަކައި އިހުލާސްތެރިކަމާއި އެކު ކުރާ އަމަލަކަށް ވުމާއި ކުރާ އަޅުކަމަކީ ރަސޫލާ ސައްލަﷲ އަލައިހި ވައްސަލަމްގެ ސުންނަތާއި އެއްގޮތްވާ ގޮތުގެ މަތީން ކުރާ އަޅުކަމަކަަށް ވުން ކަމަށް ޝަހީމް ވިދާޅުވި އެވެ.
ޝަހީމް ވިދާޅުވީ ހައްޖުގެ މަތިވެރި އަޅުކަމަކީ ކެތްތެރިކަމާއި ވަރަށް ބޮޑަށް ގުޅިފައިވާ އަމަލެއް ކަމަށާއި ހައްޖުވެރިންގެ ކަންކަން ވީހާ ވެސް ފުރިހަމައަށް ގެންދިއުމަށް ކަމާ ބެހޭ ހުރިހާ އިދާރާތަކެއް ގުޅިގެން ގިނަ މަސައްކަތްތަކެއް ކުރި ކަމުގައި ވިޔަސް، މިފަދަ ބޮޑު އޮޕަރޭޝަނެއްގައި އުއްމީދުނުކުރާ ފަދަ އެތައް ކަމެއް ހިނގާފާނެ ކަމަށެވެ.
އެފަދަ ހާލަތްތަކުގައި ވެސް ވީހާ ވެސް ބޮޑަށް ކެތްތެރިވުމަށް ޝަހީމް އިލްތިމާސްކުރެއްވި އެވެ. އަދި އެފަދަ ހާލަތްތަކުގައި ހައްޖުވެރިންނަށް ދިމާވާ ކަންކަން ހައްލުކުރުމަށް ކުރަން ޖެހޭ ހުރިހާ މަސައްކަތްތަކެއް ކުރައްވާނެ ކަމުގެ ޔަގީންކަން ވެސް އޭނާ ދެއްވި އެވެ.
ހައްޖުވެރިން އެކަކު އަނެކަކަށް އަޅާލައި އެހީތެރިވުމަށާއި އެއް ކޮޓަރިއެއްގައި ނުދަންނަ މީހަކާ އެކީ ހުންނަން ޖެހުނު ކަމަށް ވިޔަސް, އެކުވެރިކަމާ އެކު އުޅުމަށާއި ބަލި ހާލަތުގައި އެއް ހާޖީއަކު އަނެއް ހާޖީއަކަށް އެހީތެރިވުމަކީ ވެސް ވަރަށް ބޮޑު އަޅުކަމެއް ކަމަށް ޝަހީމް ވިދާޅުވި އެވެ.
ހައްޖަށް ގޮސް އުޅޭއިރު ވީހާ ވެސް ގިނައިން އަމިއްލަ ނަފުސަށާއި އާހިރަތަށާއި މައިބަފައިންނަށް އަދި މުޅި އުއްމަތަށް ހެޔޮ ދުއާ ކުރުމުގައި ދެމިތިބުމަށް ޝަހީމް ވަނީ ހައްޖުވެރިންނަށް ނަސޭހާތްތެރިވެވަޑައިގެންފަ އެވެ.
