ހުޅުމާލެ ހޮސްޕިޓަލުގެ އިމަރޖެންސީ ރޫމް 7 އެނދުން 14 އެނދަށް ބޮޑުކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއި ޙަވާލުކޮށްފިއެވެ. މިކަމާއި ގުޅޭ އެއްބަސްވުމުގައި ސޮއިކުރެއްވީ އިއްޔެ ހުޅުމާލެ ހޮސްޕިޓަލުގައި ބޭއްވުނު ރަސްމިއްޔާތެއްގައި މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ޢަބްދުއްރައްޒާޤު ހަލީމާއި އާރްޑީސީގެ މެނޭޖިންގ ޑިރެކްޓަރ އަލީ ޒުހައިރެވެ.
މި މަޝްރޫޢުގެ ދަށުން މިހާރު ހުރި 7 އެނދުގެ އިމަރޖެންސީ ރޫމް ޒަމާނީ ވަސީލަތްތަކާއެކު 14 އެނދަށް ބަދަލުކޮށް، ކްރިޓިކަލް ހާލަތްތަކުގައި ފަރުވާ ދިނުމަށް ޚާއްސަ ކުރެވޭ ތަނަކަށް ބަދަލުކުރެވޭނެއެވެ. މި މަސައްކަތް ދެމަސްދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.
ރަސްމިއްޔާތުގައި ވާހަކަފުޅު ދައްކަވަމުން މާލެ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާޤު ހަލީމް ވިދާޅުވީ ހުޅުމާލެ ހޮސްޕިޓަލް ޓާޝިއަރީ ހޮސްޕިޓަލެއްގެ ގޮތަށް ތަރައްޤީކުރާއިރު އިމަރޖެންސީ ރޫމް ބޮޑުކުރުމަކީ ކޮންމެހެން ވެސް ކުރަންޖެހޭ ކަމެއް ކަމަށެވެ. އަދި މި މަސައްކަތް ކުރިއަށްދާއިރު އިމަރޖެންސީ ރޫމުގެ ޚިދުމަތްތައް ދޭނީ ހޮސްޕިޓަލުގެ އެހެން ބައެއްގައި ކަމަށް ވިދާޅުވިއެވެ.
Advertisement
އާރްޑީސީގެ މެނޭޖިންގ ޑައިރެކްޓަރ ބްރިގޭޑިއަރ ޖެނެރަލް (ރިޓަޔަރޑް) ޢަލީ ޒުހައިރު ވިދާޅުވީ ކަނޑައެޅިފައިވާ މުއްދަތުގައި އެ ކުންފުނިން މަސައްކަތް ނިންމާނެކަމުގެ ޔަޤީންކަން އޮތް ކަމަށެވެ.
ހުޅުމާލެ ހޮސްޕިޓަލް ޓާޝިއަރީ ފެންވަރަށް ތަރައްޤީކުރުމުގެ މަސައްކަތް ދަނީ ކުރިއަށެވެ. މިގޮތުން މިހާރު ވަނީ 4 އޮޕަރޭޝަން ތިއޭޓަރާއި، 10 އެނދުގެ އިންޓެންސިވް ކެއަރ ޔުނިޓެއް (އައިސީޔޫ) އަދި ނިއޮނޭޓަލް އިންޓެންސިވް ކެއަރ ޔުނިޓެއް ޤާއިމްކޮށްފައެވެ. އަދި އަންނަ އަހަރުގެ ކުރީކޮޅު ހޮސްޕިޓަލުގެ އެނދުގެ އަދަދު އިތުރުކުރުމަށް ވެސް ވަނީ ރާވާފައެވެ.
މި މަޝްރޫޢުތަކަކީ ރައީސުލްޖުމްހޫރިއްޔާގެ ވައުދުގެ ދަށުން ހުޅުމާލެ ހޮސްޕިޓަލް ޓަރޝަރީ ފެންވަރަށް ތަރައްޤީކުރުމުގެ މަސައްކަތުގެ ތެރެއިން ކުރިއަށްގެންދާ މަސައްކަތްތަކެކެވެ. މި މަސައްކަތްތަކުގެ ތެރެއިން ގިނަ ޚިދުމަތްތަކެއް އަލަށް ޤާއިމްކޮށް، ހުޅުމާލެ ހޮސްޕިޓަލް ޓަރޝަރީ ފެންވަރުގައި ރަސްމީކޮށް ހުޅުވީ މި މަހުގެ 16 ވަނަ ދުވަހުއެވެ.
