މި އަހަރުގެ މަސްވެރިންގެ ދުވަސް ފާހަގަކުރުމުގެ ގޮތުން ފަރުމަސްވެރިކަމުގެ މުބާރާތެއް ބޭއްވުމަށް ނިންމައިފި ކަމަށް ފިޝަރީޒް މިނިސްޓްރީން މިއަދު އިޢުލާންކޮށްފިއެވެ. މި މުބާރާތް އޮންނާނީ މި އަހަރުގެ ޑިސެމްބަރު މަހުގެ 6 ވަނަ ދުވަހުއެވެ.

މިނިސްޓްރީން ބުނީ މި މުބާރާތުގައި ބައިވެރިވުމުގެ ފުރުޞަތު ހުޅުވާލާފައިވަނީ ސަރުކާރުގެ މުއައްސަސާތަކާއި ކުންފުނިތަކުގެ ދަށުން ރަޖިސްޓަރީކޮށްފައިވާ ނުވަތަ އަމިއްލަގޮތުން ރަޖިސްޓަރީކޮށްފައިވާ ޖަމްޢިއްޔާ ޖަމާޢަތްތަކަށް ކަމަށާއި، މި މުބާރާތުގެ އެންމެ ބޮޑު މަޤްޞަދަކީ ފަރުމަސްވެރިކަމަށް އިތުރު ސަމާލުކަމެއް ގެނައުމާއި، މަސްވެރިންގެ މެދުގައި ހެޔޮ ވާދަވެރިކަމެއް އުފެއްދުން ކަމަށް މިނިސްޓްރީން ބުންޏެވެ.

މިނިސްޓްރީން ބުނީ، މި މުބާރާތުގައި ވާދަކުރާ ފަރާތްތަކަށް ބޮޑެތި އިނާމުތަކެއް ކަނޑައަޅާފައިވާ ކަމަށެވެ. އެގޮތުން، އެއްވަނައަށް އަންނަ ޓީމަށް 25,000 ރުފިޔާ، ދެވަނަ ޓީމަށް 20,000 ރުފިޔާ އަދި ތިންވަނަ ޓީމަށް 15,000 ރުފިޔާ ދޭނެއެވެ. މީގެ އިތުރުން، އެންމެ ބަރު މަސް ބާނާ ފަރާތަކަށް 2,000 ރުފިޔާގެ ޚާއްޞަ އިނާމެއް ދިނުމަށްވެސް ވަނީ ހަމަޖެހިފައި ކަމަށްމމިނިސްޓްރީން ބުންޏެވެ..

މި މުބާރާތުގައި މަސްތައް ތިން ކެޓަގަރީއަކަށް ބަހާލާނެއެވެ. ފުރަތަމަ ކެޓަގަރީގައި ހިމެނެނީ ރަތްމަސް، ފިލޮޅު، ގިޔުޅު، ހިބަރު އަދި ކުރުމަހާއި ހަންޖެވެ.. ދެވަނަ ކެޓަގަރީގައި ހިމެނެނީ ތޮޅި، ގިނިމަސް، މާނިޔާމަސް، ފޮނިޔަމަސް އަދި ފާނައެވެ. އެހެނިހެން މަސްތައް ހިމެނެނީ ތިންވަނަ ކެޓަގަރީގައި ކަމަށް މިނިސްޓްރީން ބުންޏެވެ.

މިއީ 44ވަނަ މަސްވެރިންގެ ދުވަހުގެ މުނާސަބަތާއި ގުޅިގެން ފިޝަރީޒް މިނިސްޓްރީން ކުރިއަށް ގެންދާ ގިނަ ހަރަކާތްތަކުގެ ތެރެއިން އެއް ހަރަކާތެވެ. މި މުބާރާތުގެ ސަބަބުން މަސްވެރިންގެ މެދުގައި ވާދަވެރި ރޫހެއް އުފެދި، ފަރުމަސްވެރިކަމަށް އިތުރު ސަމާލުކަމެއް ލިބިގެންދާނެ ކަމަށް މިނިސްޓްރީން އުންމީދުކުރާ ކަމަށް އެ މިނިސްޓްރީން ބުންޏެވެ