އަންނަ އަހަރަކީ ރައްޔިތުންނަށް ލޮލަށް ފެންނަ، އަތްލެވޭ ތަރައްޤީގެ އަހަރަކަށް ވާނެކަމުގެ ފުރިހަމަ ޔަޤީންކަން އެބައޮތް ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޢަބްދުއްރަޙީމް މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެސަރުކާރަށް 1 އަހަރު ވުމާއި ގުޅިގެން ދައުލަތުގެ މީޑިއާ ޕްރޮގްރާމެއްގައި ވާހަކަފުޅު ދައްކަވަމުންނެވެ.
ފާއިތުވި އެއްއަހަރު ވަރަށް ބޮޑެތި ކާމިޔާބީތައް ރައީސުލްޖުމްހޫރިއްޔާ ހާސިލު ކުރެއްވިކަމަށް ޢަބްދުއްރަޙީމް ވިދާޅުވިއެވެ.
Advertisement
"ކޮންމެ ކާމިޔާބީ އަކީ އަތްލެވޭ އެއްޗެއް ނޫން. ބައެއް ކާމިޔާބީ ތަކަކީ ލޮލަށް ފެންނަ އެއްޗެއް ނޫން." ޢަބްދުއްރަޙީމް ވިދާޅުވިއެވެ. އެގޮތުން އެމަނިކުފާނު ފާހަގަ ކުރެއްވީ ރާއްޖޭގެ އިސްތިޤްލާލާއި، މިނިވަންކަން ޔަޤީން ކުރުމަށާއި، ދީނީ ވަޙުދަތު ހިމާޔަތްކޮށް ޤައުމިއްޔަތު ކުރިއެރުވުމާއި މާލީ ދަތިކަމުން އަރައިގަތުމަށް ސަރުކާރުން ކުރެއްވީ މުހިންމު މަސައްކަތްތަކެއް ކަމަށެވެ.
ޢަބްދުއްރަޙީމް ފާހަގަ ކުރެއްވި ގޮތުގައި ރައީސުލްޖުމްހޫރިއްޔާގެ އެއް ވައުދަކީ ފައިސާ ޗާޕުކުރުން ހުއްޓާލުން ކަމަށާއި އެކަން މިހާރު ނިމުމަކަށް ގެނެވިފައިވާ ކަމަށެވެ. މީގެ އިތުރުން، ޑިޕްލޮމެސީގެ ރިވެތި އުސޫލުން ބޭރު ސިފައިން ރާއްޖެއިން ފޮނުވާލުމާއި، ރާއްޖޭގެ ޚާރިޖީ ސިޔާސަތު ބައްޓަން ކުރެއްވުމުގައި ދުރެއް ގާތެއް ނުބައްލަވައި ޤައުމުގެ މައިގަނޑު އަސާސްތަކަށް އިޙްތިރާމްކުރާ އެންމެންނާއެކު ގުޅުން ޤާއިމުކުރެއްވިކަންވެސް ޢަބްދުއްރަޙީމް ފާހަގަކުރެއްވިއެވެ.
"މި ސަރުކާރު ގެންނެވީ ވަރަށް މަސައްކަތުން. އަންނަ އަހަރަކީ ރައްޔިތުންނަށް ލޮލަށް ފެންނަ އަތްލެވޭ ތަރައްޤީގެ އަހަރަކަށް ވާނެކަމުގެ ފުރިހަމަ ޔަޤީންކަން އެބައޮތް." ޢަބްދުއްރަޙީމް ވިދާޅުވިއެވެ.
ހުރިހާ ފަރާތްތަކުން ވެސް ޤައުމުގެ ތަރައްޤީއަށްޓަކައި އެއްބާރުލުން ދެއްވުމަށާއި އަދި ކުރިއަށް އޮތް އަހަރަކީ ރާއްޖޭގެ ތަރައްޤީގެ ދުވެލި އިތުރަށް ހަލުވި ވެގެންދާނެ އަހަރެއް ކަމަށް އުންމީދު ކުރައްވާ ކަމަށް ޢަބްދުއްރަޙީމް ވިދާޅުވިއެވެ.
