ޔާމީންގެ ވެރިކަން ނިމުނީ ބޮޑާކަމާއި، ކިބުރުވެރިކަމާއި އަނބިދަށުވުމުން: އަބްދުއްރަހީމް

ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ދެވަނަ ދައުރެއް ލިބިވަޑައިނުގެން އެ މަނިކުފާނުގެ ވެރިކަން ނިމުމަކަށް އައީ ބޮޑާކަމާއި، ކިބުރުވެރިކަމުގެ އިތުރުން އަނބިދަށުވުމުގެ ސަބަބުން ކަމަށް ރައްޔިތުންގެ މަޖިލީހުގެ ރައީސް އަދި ވެރިކަންކުރާ ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.

ޕީއެންސީން މާލޭގައި ބޭއްވި ޖަގަހަ ޖަލްސާއެއްގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވެރިކަން ނުނިމޭ ކަމަށާއި ނިމިގެން ދިޔައީ ރައީސް ޔާމީންގެ ވެރިކަން ކަމަށެވެ. އަދި ޔާމީންގެ ވެރިކަން ނިމުނު ސަބަބުތަކަށް އަލިއަޅުއްވާލައްވަމުން އަބްދުއްރަހީމް ވިދާޅުވީ، އެ ވެރިކަން ނިމުނީ ބޮޑާކަމާއި، ކިބުރުވެރިކަމާއި، ނުލަފާކަމާއި، ބަސްނޭހުމުގެ އިތުރުން އަނބިދަށުވުމުގެ ސަބަބުން ކަމަށެވެ. މީގެއިތުރުން އަދުލުއިންސާފު ގާއިމުނުކުރުމާއި، އަނިޔާވެރިވުމާއި، ހިޔާނާތްތެރިވެ ދިވެހި ރައްޔިތުންގެ ބައިތުލްމާލު ދިރުވާލުމަކީ ވެސް އެ ވެރިކަން ނިމެން ދިމާވި މައިގަނޑު ސަބަބުތައް ކަމަށް އޭނާ ފާހަގަކުރެއްވިއެވެ.

ރައްޔިތުންގެ މަޖިލީހަކީ "ކުއްތާ ކޮށްޓެއް" ކަމަށް ވިދާޅުވެ ރައީސް ޔާމީން ދެއްކެވި ވާހަކަފުޅުތަކަށް ރައްދު ދެއްވަމުން އަބްދުއްރަހީމް ވިދާޅުވީ، 21 އަހަރު ވަންދެން މަޖިލިސް މެންބަރުކަން ކުރައްވައި، އަދި ރައީސްކަން ވެސް ކުރައްވާފައިވާ ބޭފުޅަކު މިފަދަ މޭރުމަކުން ވާހަކަ ދެއްކެވުމުން ހާމަވަނީ އެ މަނިކުފާނުގެ ހިތްޕުޅުގައި އޮތް ހަސަދަވެރިކަމާއި ބޮޑާކަން ކަމަށެވެ. އަދި ރައްޔިތުން އިންތިހާބުކޮށްފައިވާ ރައީސުލްޖުމްހޫރިއްޔާގެ ނަންފުޅު ގެންނަން ނުކެރޭ ހިސާބަށް ޔާމީންގެ ފެންވަރު ވެއްޓިފައިވާ ކަމަށް ވެސް ވިދާޅުވިއެވެ.

މަޖިލިސް މެންބަރުންގެ މެދުގައި ހިތްހަމަނުޖެހުންތަކެއް ހުރި ކަމަށާއި މަޖިލިސް ތެރެއިން އިންގިލާބެއް އަތުވެދާނެ ކަމަށް ޔާމީން ދެއްކެވި ވާހަކަފުޅުތައް ދޮގުކުރައްވަމުން އަބްދުއްރަހީމް ވިދާޅުވީ، މަޖިލީހުގެ މެންބަރުން ތިއްބެވީ ރައީސް ޑރ. މުއިއްޒުގެ ފަހަތްޕުޅުގައި "ވަރުގަދަ ފާރެއްހެން" ސާބިތުވެ ކަމަށެވެ. އަދި ޕީއެންސީގެ ތެރޭގައި ރެނދުއަޅުވާލުމަށް ޔާމީނަށް އެއްވެސް ފަންޑިތައެއް ނުވަތަ ސިހުރެއް ނުހެއްދެވޭނެ ކަމަށް ވެސް އޭނާ ވިދާޅުވިއެވެ.

ސަރުކާރުގެ ކާމިޔާބީތަކަށް އަލިއަޅުއްވާލައްވަމުން އަބްދުއްރަހީމް އިތުރަށް ވިދާޅުވީ، މި ސަރުކާރުން އަދުލުއިންސާފާއި އަމާންކަން ގާއިމުކޮށްދީފައިވާ ކަމަށާއި، މިހާރު ދައްކަމުން ދަނީ ރައީސް ޔާމީނާއި ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ނަގާފައިވާ ދަރަނިތައް ކަމަށެވެ. އަދި 2028 ވަނަ އަހަރު ރައީސް ޑރ. މުއިއްޒަށް ދެވަނަ ދައުރެއް ހޯދައިދިނުމަށް ޕީއެންސީން ނުކުންނާނީ "ފިސާރި ގަދަކޮށް" ކަމަށް އަބްދުއްރަހީމް ވިދާޅުވިއެވެ.