ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) އަށް 4 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަޞްދީޤުކުރައްވައިފިއެވެ.
މި ބިލަކީ 13 ނޮވެމްބަރ 2023 ގައި ބޭއްވި 20 ވަނަ ރައްޔިތުންގެ މަޖިލީހުގެ 49 ވަނަ ޖަލްސާއިން ފާސްކުރި ބިލެކެވެ.
މި އިޞްލާޙުގެ ދަށުން، އުވާލެވޭ ސިޔާސީ ޕާޓީއެއްގެ ނަމާއި ނިޝާނާއި ސިއްކައާއި ކުލައާއި އެހެނިހެން ރަމްޒުތައް އަލަށް އުފައްދާ ޕާޓީއަކަށް ބޭނުންކުރެވޭނީ އުވާލެވުނު ތާރީޚުން ފެށިގެން 5 އަހަރު ފަހުންނެވެ. މީގެ އިތުރުން، ޕާޓީ ރަޖިސްޓްރީ ކުރުމުގެ އުސޫލުތަކަށްވެސް ވަނީ ބަދަލުތަކެއް ގެނެސްފައެވެ.
ސިޔާސީ ޕާޓީތަކަށް ދައުލަތުގެ ބަޖެޓުން ދޭ ފައިސާގެ މިންވަރު ވެސް މި އިޞްލާޙުގައި ވަނީ ބަޔާންކޮށްފައެވެ. އެގޮތުން، ދައުލަތުގެ އަހަރީ ބަޖެޓުގައި އެ އަހަރަކަށް ލަފާކުރާ އާމްދަނީގެ 0.1 އިންސައްތަ އާއި 0.2 އިންސައްތަ އާއި ދެމެދުގެ އަދަދެއް ޕާޓީތަކަށް ދޭންޖެހޭނެ ކަމަށް ވަނީ ކަނޑައަޅާފައެވެ.
އަދި ޤާނޫނާ ޚިލާފުވާ ފަރާތްތަކަށް ކަނޑައެޅިފައިވާ އަދަބުތަކަށްވެސް ވަނީ ބަދަލު ގެނެސްފައެވެ. އެގޮތުން، ޤާނޫނާ ޚިލާފުވާ ފަރާތްތައް 30,000 ރުފިޔާއާއި 75,000 ރުފިޔާއާ ދެމެދުގެ އަދަދަކުން ޖޫރިމަނާކުރުމާއެކު، އެ ޢަމަލު ހިންގި ފަރާތް ނިސްބަތްވާ ޕާޓީ 100,000 ރުފިޔާއިން ޖޫރިމަނާކުރެވޭނެއެވެ.
މި އިޞްލާޙު ގެޒެޓުގައި ޝާއިޢުކުރާ ދުވަހުން ފެށިގެން ޢަމަލުކުރަން ފަށާނެއެވެ. ސިޔާސީ ޕާޓީގެ ޤާނޫނަކީ ދިވެހިރާއްޖޭގައި ސިޔާސީ ޕާޓީތައް އުފެއްދުމާއި، ހިންގުމާއި، އުވާލުމާ ގުޅޭ އެންމެހައި ކަންކަން ތަންފީޛުކުރާ ޤާނޫނެވެ.
