މި ސަރުކާރަކީ އުއްމީދު ގެނެސްދޭނެ ސަރުކާރެއް ކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަތީފް ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް އެއް އަހަރު ފުރުމާއި ގުޅިގެން ނައިބު ރައީސް ޕީއެސްއެމްއަށް ދެއްވި އިންޓަވިއުއެއްގައި އެމަނިކުފާނުވަނީ މި ސަރުކާރުން ވެރިކަމާއި ޙަވާލުވިއިރު ރާއްޖެއޮތް ޙާލަތުން އަރައިގަތުމަށް ކޮށްފައިވާ މަސައްކަތްތަކުގެ ތަފްޞީލު ހިއްސާކުރައްވާފައެވެ. އަދި ސަރުކާރުން ހުރިހާ މަސައްކަތްތަކެއް ކުރަމުން ގެންދަނީ ރައްޔިތުންގެ ލާބަޔާއި މަންފާއަށް ކަމަށް ނައިބު ރައީސް ވިދާޅުވިއެވެ.
އެގޮތުން މި ސަރުކާރު ވެރިކަމާއި ޙަވާލުވިއިރު ވާރުތަވެފައިވާ ދަރަންޏާއި، އެދަރަނި އަދާކުރާނެ ރޭވުންތެރި އިންތިޒާމެއް ނެތުމުގެ ސަބަބުން، އޭރު ގިނަބަޔަކަށް ހީވެފައިވަނީ ދެމަސް ދުވަހުގެ ތެރޭ ދައުލަތް ބަނގުރޫޓުވެދާނެ ކަމަށް ކަމުގައި ނައިބު ރައީސް ވިދާޅުވިއެވެ. ނަމަވެސް މި ސަރުކާރުން ވަނީ ފައިސާ ޗާޕުނުކޮށް، ސަބްސިޑީ އުސޫލަށް ބަދަލު ގެނައުން ފަދަ އުނދަގޫ ނިންމުންތައް ނިންމައި، އެ ގޮންޖެހުންތަކުން އަރައިގަތުމުގައި ކުރިއެރުންތަކެއް ހޯދާފައިކަމަށް އެމަނިކުފާނު ވިދާޅުވިއެވެ.
މީގެ އިތުރުން ކުރިއަތްއޮތް ތަނުގައި ރާއްޖޭގެ މެނިފެސްޓޯ ތަންފީޛުވަމުން އަންނަ މަންޒަރު ފެންނާނެ ކަމަށް ނައިބު ރައީސް ވިދާޅުވިއެވެ. އަދި ބަޖެޓުގެ ބޮޑުބައެއް ގެދޮރުވެރިކަމާއި ބޯހިޔާވަހިކަމަށް ޚާއްޞަކޮށް، ކުރިއަށްއޮތްތަނުގައި ބޯހިޔާވެހިކަމުގެ ގިނަ މަޝްރޫޢުތަކެއް ފެށިގެންދާނެ ކަމަށް އެމަނިކުފާނު ވިދާޅުވިއެވެ.
ހަމައެއާއެކު ޤައުމުގެ އިޖުތިމާޢީ ފޭރާން ރަނގަޅުކުރެއްވުމުގެ ގޮތުން ސަރުކާރުން އަންނަނީ ޒުވާންޖީލު ހަރުދަނާ ގޮތުގައި ބިނާކުރުމަށް މަސައްކަތްކުރަމުން ކަމަށް ނައިބު ރައީސް ވިދާޅުވިއެވެ. އަދި މުޖުތަމަޢުގެ ކަންކަން ހަމައިން ނެއްޓިދާނެ ފަދަ ސިޔާސީ ނިންމުންތަކުން އެއްކިބާވެ، ކުށާއި މާރާމާރީ މަދުކުރެވި، ޢާންމު މަސްލަޙަތު ހުރި ކަންކަމުގައި ލުއިތައް ލިބެމުންދާ މަންޒަރު މިއަދު ފެންނަމުންދާކަމުގައި ނައިބު ރައީސް ވިދާޅުވިއެވެ.
