ގިނަ ޚިދުމަތްތަކެއް އަލަށް ޤާއިމްކޮށް، ޓަރޝަރީ ފެންވަރުގައި ހުޅުމާލެ ހޮސްޕިޓަލް ރަސްމީކޮށް ހުޅުވައިފިއެވެ. މިއަދު މި ހޮސްޕިޓަލް ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މިއާއެކު ހުޅުމާލޭގެ ރައްޔިތުންނަށް ފެންވަރު ރަނގަޅު ޞިއްޙީ ޚިދުމަތްތަކެއް ލިބިގެންދާނެ ކަމަށް ބެލެވެއެވެ.

ހޮސްޕިޓަލް ހުޅުވުމުގެ ރަސްމިއްޔާތުގައި ވާހަކަދައްކަވަމުން ދަރުމަވަންތަ ހޮސްޕިޓަލްގެ ސީއީއޯ އިބްރާހިމް ޢަބްދުއްރައްޒާޤު ޙަލީމް ވިދާޅުވީ، ރައީސް މުޢިއްޒުގެ އަމާޒަކީ ރާއްޖޭގެ ޞިއްޙީ ދާއިރާއަށް އިންޤިލާބީ ބަދަލެއް ގެނައުން ކަމަށެވެ. އަދި ހުޅުމާލޭގެ ރައްޔިތުންނަށް ޚިދުމަތް ދެމުންދާ ހަމައެކަނި ސަރުކާރު ހޮސްޕިޓަލަށްވާތީ، ރައީސް ޚާއްސަ އިސްކަމެއް ދެއްވާފައިވާ ކަމަށްވެސް ވިދާޅުވިއެވެ. މީގެ އިތުރުން، މާލެ ސަރަހައްދުގައި ހުރި ހޮސްޕިޓަލްތަކަށް ބޭނުންވާ ޞިއްޙީ ޚިދުމަތްތެރިންނާއި ހިންގުމަށް ބޭނުންވާ ފައިސާ ހަމަޖައްސައިދީ، ޞިއްޙީ ދާއިރާއަށް ބޮޑު ކުރިއެރުމެއް ރައީސް ޑރ. މުޢިއްޒު ހޯއްދަވައިދެއްވާފައިވާކަން ފާހަގަކުރެއްވިއެވެ.

ޓަރޝަރީ ފެންވަރަށް ތަރައްޤީކުރުމުގެ ގޮތުން، ހުޅުމާލެ ހޮސްޕިޓަލުގައި ގިނަ ޚިދުމަތްތަކެއް ވަނީ ޤާއިމްކޮށްފައެވެ. އޭގެ ތެރޭގައި:

1. ޒަމާނީ ވަޞީލަތްތަކާއެކު 4 އޮޕަރޭޓިން ރޫމް ހިމެނޭ އޮޕަރޭޝަން ތިއޭޓަރ ކޮމްޕްލެކްސެއް: މިތަނުގައި ލޮލުގެ ބަލިތަކަށާއި ކަށީގެ ބަލިތަކަށާއި އަންހެނުންގެ ބަލިތަކުގެ އިތުރުން އާންމު ސަރޖަރީތަކަށް ޚާއްސަ 4 އޮޕަރޭޓިން ކޮޓަރި ހިމެނެއެވެ. މި ކޮމްޕްލެކްސްއާއެކު ލެޕަރަސްކޯޕިކް ސަރޖަރީތައް ފަސޭހަކަމާއި އިތުބާރާއެކު ކުރެވޭނެއެވެ.

2. 10 އެނދުގެ އިންޓެންސިވް ކެއަރ ޔުނިޓު (އައިސީޔޫ): މި ޔުނިޓުގައި ގައިންގަޔަށް އަރާ ބަލިތަކުގައި ހާލު ބޮޑުވާ މީހުންނަށް ގާތުން ފަރުވާ ދިނުމަށް އައިސޮލޭޝަން ޔުނިޓެއްވެސް ހިމެނެއެވެ.

3. 14 އެނދުގެ ނިއޮނޭޓަލް އިންޓެންސިވް ކެއަރ ޔުނިޓު: ދަރިމައިވުމުގެ މައްސަލަތައް ދިމާވާ މީހުންނަށް ފަރުވާދިނުމަށް ޒަމާނީ ފެންވަރުގައި ތަރައްޤީކޮށްފައިވާ ޔުނިޓެކެވެ.

4. ސެންޓްރަލް ސްޓްރެއިލް ސަރވިސް ޑިޕާޓްމަންޓް: ޚިދުމަތް ދިނުމުގައި ބޭނުންކުރާ ޞިއްޙީޞިއްޙީ އާލާތްތައް ސާފުކުރުމުގެ މަސައްކަތްކުރާ ތަނެވެ. މީގެ ކުރިން ހޮސްޕިޓަލުގައި ހުންނަނީ އާލާތްތައް ސާފުކުރަން ބޭނުންކުރާ އެއް މެޝިނެވެ. ނަމަވެސް ޒަމާނީ ފެންވަރުގެ މެޝިނަރީއާއެކު މި ޤާއިމްކުރެވުނު ޑިޕާޓްމަންޓާއެކު މެޑިކަލް އާލާތްތަކުގެ ރައްކާތެރިކަން ކަށަވަރުކުރެވޭނެއެވެ.

މި ތަރައްޤީތަކުގެ އިތުރުން، މާލެ ސިޓީ ގްރޫޕް އޮފް ހޮސްޕިޓަލްސްގެ ވިއުގަ ފުޅާކުރުމުގެގޮތުން އައިޖީއެމްއެޗް އަދި ދަރުމަވަންތަ ހޮސްޕިޓަލުގެ ޑޮކްޓަރުންވެސް މި ތިއޭޓަރުތަކުގައި ސަރޖަރީތައް ކުރިއަށްގެންދިއުމަށް ހަމަޖެހިފައިވާކަމަށް ހުޅުމާލެ ހޮސްޕިޓަލުން ވިދާޅުވެފައިވެއެވެ. މިކަމުން ހުޅުމާލޭގެ ރައްޔިތުންނަށް އިތުރު ޚިދުމަތްތަކެއް ލިބިގެންދާނެ ކަމަށް ބެލެވެއެވެ.

މިހާރު ހުޅުމާލޭގެ ރައްޔިތުންނަށް ގިނަ ބާވަތްތަކެއްގެ ޞިއްޙީ ޚިދުމަތްތައް ރަށުން ބޭރަށް ދިއުމަކާ ނުލައި ލިބިގެންދާނެއެވެ. މީގެ އިތުރުން، ޓަރޝަރީ ފެންވަރުގެ ޚިދުމަތްތައް ލިބެން ފެށުމުން، މާލޭގެ އެހެން ހޮސްޕިޓަލްތަކަށް ކުރިމަތިވެފައިވާ ޕްރެޝަރު ކޮންމެވެސް ވަރަކަށް ލުއިވެގެންދާނެ ކަމަށްވެސް ބެލެވެއެވެ.