މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ފާއިތުވި ހަފްތާގައި ތަންފީޛުކުރަން ފެށި ބޭރު ފައިސާ ގަނެވިއްކުމުގެ އައު ޤަވާޢިދަށް ރައްޔިތުންގެ ފަރާތުން ބޮޑު ތަރުޙީބެއް ލިބެމުންދާކަން ފާހަގަކުރެވެއެވެ. މި ޤަވާޢިދަކީ 1987 އިން ފެށިގެން ޢަމަލުކުރަމުން އައި ޤަވައިދުގެ ބަދަލުގައި ޢަމަލުކުރަން ފެށި އައު ޤަވާޢިދެވެ.

އައު ޤވާޢިދުގެ ދަށުން، ފަތުރުވެރިކަމުގެ ޚިދުމަތްދޭ ތަންތަން ދެ ގިންތިއަކަށް ބަހާލައި، އެއިން ކޮންމެ ތަނަކަށް އަންނަ ކޮންމެ ފަތުރުވެރިއަކަށް ކަނޑައެޅޭ ވަކި މިންވަރަކަށް ބޭރު ފައިސާ ބޭންކިން ނިޒާމުގެ ތެރެއަށް މާރުކުރުމަށް ލާޒިމުކޮށްފައިވެއެވެ. މީގެ ތެރެއިން އޭ ކެޓަގަރީގައި ހިމެނޭ ރިސޯޓުތަކާއި، ބޮޑެތި ހޮޓާތަކާއި ޓުއަރިސްޓް އުޅަނދުތަކުން ކޮންމެ ފަތުރުވެރިއަކަށް 500 ޑޮލަރުގެ ރޭޓުން ބޭންކަށް ރުފިޔާ މާރުކުރަން ޖެހެއެވެ. އަދި ބީ ކެޓަގަރީގައި ހިމެނޭ ގެސްޓް ހައުސްތަކާއި މީހުން ދިރިއުޅޭ ރަށްރަށުގައި ހިންގާ ޓޫރިސްޓު ހޮޓާތަކުން ކޮންމެ ފަތުރުވެރިއަކަށް 25 ޑޮލަރުގެ ރޭޓުން މާރުކުރަން ޖެހެއެވެ.

މި ބަދަލުގެ ސަބަބުން ބޭންކިން ނިޒާމުގެ ތެރެއަށް ވަންނަ ބޭރު ފައިސާގެ ޢަދަދު އިތުރުވެ، ބޭންކުތަކަށް ބޭނުންވާ ބޭރުފައިސާ މެދުނުކެނޑި ފޯރުކޮށްދެވޭނެ ކަމަށް އެމްއެމްއޭއިން ބުނެއެވެ. މީގެ ސަބަބުން ކުރިމަގުގައި ބޭންކުތަކުން ފަސޭހައިން ޑޮލަރު ލިބޭނެ މަގު ތަނަވަސްވެގެންދާނެ ކަމަށް ގިނަ ރައްޔިތުން އުންމީދުކުރެއެވެ.

ސޯޝަލް މީޑިއާގައި ގިނަ ބަޔަކު މި ބަދަލަށް މަރުޙަބާ ކިޔަމުންދާއިރު، މިއީ ޒަމާންވީއިރު ގެނެވިފައިނުވާ މުހިންމު ބަދަލެއްކަމަށް ފާހަގަކުރެވެއެވެ. އަދި މިއީ ޑޮލަރުގެ ކަޅު ބާޒާރުތަކުގެ ދޮރުތައް ބަންދުވެގެންދާނެ ކަމަކަށްވުމުން، ޢާންމު ރައްޔިތުންނަށް ބޮޑު ފައިދާއެއް ކުރާނެ ބަދަލެއްކަމަށް ގިނަ ބަޔަކު ދެކެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ، މި ސަރުކާރު ކުރިޔަށްދާނީ ރައްޔިތުންގެ ފަޅީގައި އޮވެ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމުގައި ކަމަށެވެ. އަދި ތަނަވަސްކަން ނެތް ރައްޔިތުންނަށް ފައިދާއެއް ވާން ނޭދޭ ސިޔާސީވެރިންގެ ޙަޤީޤަތް ކުރިޔަށް އޮތް ތާނގައި އިތުރަށް ހާމަވެގެންދާނެ ކަމަށްވެސް ރައީސް ވިދާޅުވިއެވެ.