ދިވެހިރާއްޖޭގެ ޤައުމީ ޔުނިވަރސިޓީއާއި އިސްލާމީ ޔުނިވަރސިޓީގެ ދަރިވަރުންގެ ޔޫނިއަންތައް ގުޅިގެން، ފަލަސްޠީނާއި ގުޅޭ ފުރަތަމަ ޢިލްމީ ފޯރަމް އިންތިޒާމުކުރަން ނިންމައިފިއެވެ.

މި ފޯރަމަކީ ދިވެހިރާއްޖޭގައި މަތީ ތަޢުލީމު ޙާޞިލުކުރާ ދަރިވަރުން ފަލަސްޠީނުގެ މައްސަލައާއި ގުޅޭގޮތުން ބާއްވާ ފުރަތަމަ ޢިލްމީ ފޯރަމެވެ.

މި ފޯރަމް ބޭއްވުމަށް ހަމަޖެހިފައިވަނީ މިމަހުގެ 24 ވަނަ ދުވަހުއެވެ. މި ފޯރަމްގައި ފަލަސްޠީނުގެ މައްސަލައާ ގުޅޭ ޢިލްމީ ނަޒަރިއްޔާތަކުން ވާހަކަދެކެވި، މަޝްވަރާކުރެވޭނެ ކަމަށް މަޢުލޫމާތު ލިބެއެވެ.

^{ދިވެހިރާއްޖޭގެ ޤައުމީ ޔުނިވާސިޓީގެ ދަރިވަރުން އަދި އިސްލާމީ ޔުނިވާސިޓީގެ ދަރިވަރުންގެ ގުޅުމުން ބާއްވާ ފަލަސްތީން ފޯރަމް އޮންނާނީ މިމަހުގެ 24 ގައި.}

މި ފޯރަމަކީ ދިވެހިރާއްޖޭގެ މަތީ ތަޢުލީމުގެ ދާއިރާގައި ފަލަސްޠީނުގެ މައްސަލައާ ގުޅޭގޮތުން ބާއްވާ ފުރަތަމަ ޢިލްމީ ފޯރަމް ކަމަށްވުމާއެކު، ގިނަ ދަރިވަރުންނާއި އާންމުންގެ ޝައުޤުވެރިކަން މި ފޯރަމަށް ލިބޭނެ ކަމަށް ދަރިވަރުން އުންމީދުކުރެއެވެ.

ފަލަސްޠީނު މައްސަލައިގައި ދިވެހި ސަރުކާރުން ދަނީ ވަރަށް ފާޅުކަން ބޮޑުކޮށް އިސްރާއީލަށާއި އދ އަށްވެސް ފާޑު ކިޔަމުންނެވެ. އެގޮތުން ވީޓޯ ކުރުމުގެ ބާރު އުވާލުމަށް ރައީސް ޑރ. މުޙައްމަދު ވިދާޅުވީވެސް ފަލަސްޠީނުގެ މައްސަލައިގައި އިސްރާއީލުގެ މަސްލަޙަތު ޙިމާޔަތް ކުރުމަށް އެމެރިކާއިން ވީޓޯގެ ބާރު ނާޖާއިޒް ގޮތުގައި ބޭނުންކުރާތީކަން ފާހަގަ ކުރެވެއެވެ.