ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ)ގެ ދާއިރާތަކުގެ އިންތިޚާބުގެ އާންމު ކުރެވުނު ކެނޑިޑޭޓުންގެ ލިސްޓު މުރާޖަޢާކުރަމުން އަންނަ ކަމަށް އެ ޕާޓީން ބުނެފިއެވެ.

ޕީއެންސީން ނެރުނު ޢިއުލާނުގައި ބުނެފައިވަނީ އާންމުކުރެވުނު ލިސްޓާ ބެހޭ ގޮތުން ބައެއް ފަރާތްތަކުން ކަންކަން ފާހަގަކޮށްފައިވާތީ، އެކަންކަން ބެލުމުން ކޮންމެވެސް ވަރަކަށް އޭގެން އިދާރީ މައްސަލަތަކެއް ފެނިފައިވާ ކަމަށެވެ.

ނޮވެމްބަރު 13 2024 ވަނަ ބުދަ ދުވަހުގައި އެ ޕާޓީ އިން ނެރިފައިވާ އިޢުލާނު ނަންބަރު PNC/IUL/2024/005 ގައިވާ އިދާރީ މައްސަލަތަށް ހައްލުކުރުމަށްޓަކައި މުރާޖަޢާ ކުރެވެމުންދާ ކަމަށް ޕީއެންސީގެ އިއުލާނުގައި ބުނެފައިވެއެވެ. އަދި އަލުން އެ މުރާޖަޢާ ކުރުމަށް ފަހު 16 ނޮވެމްބަރު 2024 ގައި އާންމުކުރާނެ ކަމަށް ވެސް ބުނެފައިވެއެވެ.

ޕީޕަލްސް ނޭޝަނަލް ކޮންގްރެސް ޕާޓީއަކީ މިހާރު ސަރުކާރު ހިންގާ މައި ޕާޓީއަށްވީ އިރު އެ ޕާޓީއަކީ ދިވެހިރާއްޖޭގެ އެންމެ މީހުން ގިނަ ވެސް ޕާޓީއެވެ. މަޖިލީހުގެ މުޅި މެޖޯރިޓީ ވެސް އޮތީ މި ޕާޓީއަށެވެ. މިހާތަނަށް އައިރު ނިސްބަތުން ގިނަ ބަޔަކު ވަނީ މި ޕާޓީއާއި ގުޅިފައެވެ.