މޫސުމީ ނުރައްކާތަކުން ސަލާމަތްވުމަށް ރެޒިލިއަންސް އެޖެންޑާއެއް އެކުލަވާލި ދުނިޔޭގެ ފުރަތަމަ ޤައުމުކަމަށް ރާއްޖެ ވެއްޖެއެވެ.
އަޒަރުބައިޖާނުގައި މިހާރު ކުރިއަށްދާ ކޮޕް ސަމިޓުގެ ތެރެއިން ބޭއްވުނު ޕެނަލް ޑިސްކަޝަނެއްގައި ވާހަކަފުޅު ދައްކަވަމުން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެމަނިކުފާނުގެ ވެރިކަމުގައި އެކުލަވާލެވުނު މި ރެޒިލިއަންސް އެޖެންޑާއަކީ ކާރިޘާތަކުން ރައްކާތެރިވުމަށްޓަކައި ދުރާލާ އިންޒާރުދޭ ނިޒާމުތައް ޤާއިމުކޮށް، ރާއްޖޭގެ ހުރިހާ ކަންކޮޅެއްގައި އުޅޭ ހުރިހާ ރައްޔިތުންގެ ރައްކާތެރިކަން ކަށަވަރުކުރުމަށް އަމާޒުކޮށްފައިވާ މުހިންމު ސްޓްރެޓީޖިކް ރޯޑްމެޕެކެވެ. މިކަމަށް ސަރުކާރުން ވަރަށް ބޮޑު އިސްކަމެއް ދެއްވާކަމަށް ރައީސް ފާހަގަކުރެއްވިއެވެ.
ރައީސް މުޢިއްޒު ވިދާޅުވީ ސަރުކާރުން އެކަށައަޅާ 20 އަހަރުގެ ތަރައްޤީގެ ޕްލޭންގައި ކްލައިމެޓް ރެޒިލިއަންސް، ޑިސާސްޓަރ ޕްރިޕޭއާޑްނަސް އަދި ދުރާލާ އިންޒާރުދޭ ސިސްޓަމްތަކަށް އިސްކަންދީފައިވާނެ ކަމަށެވެ. މިއީ މުސްތަޤްބަލް ރައްކާތެރިކުރުމަށް އަޅާ މުހިއްމު ފިޔަވަޅެއްކަމަށްވެސް ރައީސް ފާހަގަކުރެއްވިއެވެ.
ރާއްޖެއަށް އެތައް ގޮތަކުން ބޮޑެތި ގެއްލުންތަކެއް ލިބުނު ސުނާމީ ކާރިޘާއިން ލިބުނު ފިލާވަޅުތަކުގެ މައްޗަށް ބިނާކޮށް، ދުރާލާ ލިބޭ އިންޒާރުތަކާއި ތައްޔާރީ ޙާލަތުގައި ތިބުމަކީ ގިނަ ބައެއްގެ ފުރާނަ ސަލާމަތްކޮށް، ގެއްލުން ކުޑަކުރެވޭނެ ކަމެއްކަން ރައީސް މުޢިއްޒު ފާހަގަކުރެއްވިއެވެ. އަދި މިފަދަ ނިޒާމުތަކަކީ އިޤްތިޞާދީގޮތުން ކޮންމެހެންވެސް ކުރަންޖެހޭ އިންވެސްޓްމަންޓެއްކަމަށްވެސް ވިދާޅުވިއެވެ.
ރައީސް މުޢިއްޒުގެ ސަރުކާރުން މިހާތަނަށް ކޮށްފައިވާ މަސައްކަތްތަކުގެ ސަބަބުން ރާއްޖެއިން ވަނީ މިދާއިރާއިން ގިނަ ކުރިއެރުންތަކެއް ހޯދާފައެވެ. ނަމަވެސް މި މަސައްކަތް އިތުރަށް ކާމިޔާބުކުރުމަށް އިތުރު ވަސީލަތްތަކާއި އެހީތެރިކަން ބޭނުންވާކަން ރައީސް ފާހަގަކުރެއްވިއެވެ. އެގޮތުން ޚާއްޞަކޮށް މެރިން ފޯކާސްޓިންގ އެންޑް އޮބްޒަވޭޝަން އަދި ދުރާލާ އިންޒާރުދޭ ކެޕެބަލިޓީ ތަރައްޤީކުރުމުގައި ބައިނަލްއަޤްވާމީ އެހީތެރިކަމާއި އެއްބާރުލުން ބޭނުންވާކަމަށް ރައީސް މުޢިއްޒު ވިދާޅުވިއެވެ.
