ރާއްޖޭގެ އިޤްތިޞާދީ ހަމަޖެހުމާއި ކުރިއެރުން ދިގު މުއްދަތަކަށް ދެމެހެއްޓުމަށްޓަކައި، ސަރުކާރު ހިއްސާވާ ކުންފުނިތަކާ (އެސްއޯއީ) ބެހޭ ޚާއްޞަ ޤާނޫނެއް އެކުލަވާލުމުގެ މަސައްކަތް ސަރުކާރުން ފަށައިފިއެވެ. މި ޤާނޫނު އަންނަ އަހަރުގެ ފުރަތަމަ ދައުރުގައި ރައްޔިތުންގެ މަޖިލީހަށް ހުށަހެޅުމަށް ވަނީ ރޭވިފައެވެ.

ސަރުކާރުން ބުނީ، މި އައު ޤާނޫނުގެ މައިގަނޑު މަޤްޞަދަކީ އެސްއޯއީތަކުގެ ހިންގުން ހަރުދަނާކުރުމެވެ. މިގޮތުން، ސާފު ގަވަނަންސް އޮނިގަނޑެއް ޤޤއިމްކޮށް، އެސްއޯއީތަކުގެ މިލްކުވެރިކަމުގެ ސިޔާސަތުތައް ކަނޑައަޅައި، އަދި އެ ކުންފުނިތައް ހިންގުމާއި ބެލެހެއްޓުމުގެ މިންގަނޑުތައް ކަނޑައެޅޭނެ ކަމަށް ސަރުކާރުން ފާހަގަކުރިއެވެ.

އެގޮތުން، ޤާނޫނުގައި ހިމެނޭނެ މުހިންމު ބައިތަކުގެ ތެރޭގައި އެސްއޯއީގެ މާނަ ކަނޑައެޅުމާއި، ދައުލަތުގެ މިލްކުވެރިކަމުގެ މަޤްޞަދު ބަޔާންކުރުމާއި، ބޯޑު މެންބަރުން އައްޔަންކުރުމުގެ އިޖުރާޢަތްތައް ކަނޑައެޅުމާއި، ހާމަކަން އިތުރުކުރުމުގެ ޝަރުޠުތަކާއި މާލީ ކަންކަން ބެލެހެއްޓުމުގެ ނިޒާމުތައް ހިމެނެއެވެ. މީގެ އިތުރުން، އެސްއޯއީތަކުގެ ގަވަނަންސްގައި ހިމެނޭ ސަރުކާރުގެ އިދާރާތަކުގެ ދައުރާއި މަސްއޫލިއްޔަތުތައްވެސް މި ޤާނޫނުން ސާފުކޮށްދޭނެއެވެ.

ސަރުކާރުން އިތުރަށް ހާމަކުރި ގޮތުގައި، މިހާރު ޢަމަލުކުރަމުންދާ ޕްރައިވަޓައިޒޭޝަން އެންޑް ކޯޕަރައިޓައިޒޭޝަން ޤާނޫނު އުވާލައި، ހިއްސާދާރުގެ ހައިސިއްޔަތުން ފިނޭންސް މިނިސްޓްރީން އެސްއޯއީތަކުގެ އެންމެހައި ކަންކަން ބެލެހެއްޓުމުގެ ޒިންމާ ނަގާނެއެވެ. އަދި މިހާރުގެ ޤާނޫނުގައި ހިމެނޭ މުހިންމު އިޖުރާޢަތްތައް އައު ޤާނޫނުގައިވެސް ހިމެނޭނެ ކަމަށް ސަރުކާރުން ބުންޏެވެ.

މީގެ އިތުރުން، ސަރުކާރުން ވަނީ ބައެއް އެސްއޯއީތަކަށް ބަދަލުތަކެއް ގެނައުމަށް ނިންމާފައެވެ. މިގޮތުން، އެސްޓީއޯއިން ފެނަކައިގެ ހިއްސާ ގަތުމާއި، އެމްއޭސީއެލް އާއި ރީޖަނަލް އެއާޕޯޓްސް ކޮމްޕެނީ އެއްކޮށްލުމާއި، އެޗްޑީސީގެ ދަށަށް އެފްޑީސީ ގެނައުން ހިމެނެއެވެ. އަދި އެގްރޯނޭޝަނަލް ކޯޕަރޭޝަނާއި މޯލްޑިވްސް ސްޕޯޓްސް ކޯޕަރޭޝަން އުވާލުމަށް ވެސް ސަރުކާރުން ވަނީ ނިންމާފައެވެ.