މެދުއިރުމަތީގައި ހިނގަމުންދާ ހަނގުރާމައާއި ގުޅިގެން ރާއްޖޭގެ އިގުތިސާދަށް ކުރާ އަސަރުތައް ކުޑަކުރުމަށްޓަކައި، ސަރުކާރު ހިއްސާވާ ކުންފުނިތަކުން ހަރަދު ކުޑަކުރުމުގެ ހަރުދަނާ ފިޔަވަޅުތަކެއް އެޅުމަށް ޕްރައިވެޓައިޒޭޝަން އެންޑު ކޯޕަރަޓައިޒޭޝަން ބޯޑު (ޕީސީބީ) އިން އަންގައިފިއެވެ.
މިކަން އަންގާފައިވަނީ ސަރުކާރުގެ ހުރިހާ ކުންފުނިތަކަކަށް ޕީސީބީން ފޮނުވި ހާއްސަ ސާކިއުލާއެއްގައެވެ.
ޕީސީބީން ބުނިގޮތުގައި މިދިޔަ މާޗު މަހުގެ 30 ވަނަ ދުވަހުވެސް ކުންފުނިތަކުން ހަރަދު ކުޑަކުރުމަށް ފިޔަވަޅުތަކެއް އެޅުމަށް އަންގާފައިވާނެއެވެ. ނަމަވެސް، މިހާރުގެ ދުނިޔޭގެ މަޝްރަހާއި އިގުތިސާދީ ހާލަތަށް ރިއާޔަތްކޮށް، އިތުރު ހަރުދަނާ ފިޔަވަޅުތަކެއް އެޅުން މިވަގުތު މުހިންމު ކަމަށް އެ ބޯޑުން ވަނީ ފާހަގަކޮށްފައެވެ. މީގެ ކުރިން އެޅި ފިޔަވަޅުތަކުގެ ތެރޭގައި މައިގަނޑު ގޮތެއްގައި ހިމެނެނީ ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް މަދުކުރުމެވެ.
ޕީސީބީން އަލަށް އެޅުމަށް އެންގި ފިޔަވަޅުތަކުގެ ތެރޭގައި މުވައްޒަފުންގެ މުސާރައާއި އިނާޔަތްތަކަށް ކުރާ ހަރަދު ބޮޑުތަނުން ކުޑަކުރުން ހިމެނެއެވެ. އެގޮތުން، ރަސްމީ ގަޑީގައި މަސައްކަތްތައް ނިންމޭނެ ގޮތަކަށް ކަންކަން ރޭވުމަށާއި، ކޮންމެހެން ކުރަންޖެހޭ މަސައްކަތެއް މެނުވީ އިތުރުގަޑީގައި ނުކުރުމަށް ވަނީ އަންގާފައެވެ. މީގެ އިތުރުން، މުވައްޒަފުންނަށް މަގާމުގެ ކުރިއެރުން ދިނުން މިވަގުތަށް މަޑުޖައްސާލުމަށާއި، ކުންފުނީގެ އޮޕަރޭޝަންތަކަށް ކޮންމެހެން ބޭނުންވާ މުވައްޒަފުން ފިޔަވައި އިތުރު މީހުން ވަޒީފާއަށް ނުނެގުމަށްވެސް ވަނީ އިރުޝާދު ދީފައެވެ.
ކުންފުނިތަކުގެ ކޭޝްފްލޯ ދެމެހެއްޓެނިވި ގޮތެއްގައި މެނޭޖްކުރުމަށްޓަކައި، ކުންފުނީގެ އަސާސީ މަސްއޫލިއްޔަތުތައް އަދާކުރުމަށް ކުރަންޖެހޭ ހަރަދުތައް ފިޔަވައި އެހެން ހަރަދުތައް ނުކުރުމަށް ޕީސީބީން ވަނީ ބާރުއަޅާފައެވެ. އަދި ކޮންމެހެން ބާއްވަންޖެހޭ ހަފްލާތައް ފިޔަވައި އެހެން ހަފްލާތައް ނުބޭއްވުމަށާއި، ހަފްލާތައް ބޭއްވުމުގައިވެސް ވީހާވެސް ހަރަދު ކުޑަވާނެ ގޮތްތައް ބެލުމަށް ވަނީ އަންގާފައެވެ. މިގޮތުން، އެއް ކުންފުނިން އަނެއް ކުންފުންޏަށް ވަސީލަތްތައް ހިއްސާކުރުމަށްވެސް ވަނީ ލަފާދީފައެވެ.
ޕީސީބީގެ ސާކިއުލާގައި އިތުރަށް ބަޔާންކޮށްފައިވަނީ، މެދުއިރުމަތީގެ ހަމަނުޖެހުންތަކުގެ ސަބަބުން އިގުތިސާދަށް ކުރާނެ އަސަރުތައް ދިރާސާކޮށް، ރައްޔިތުންނަށް ކުރިމަތިވެދާނެ މާލީ ބުރަތަކަށް ވިސްނައިގެން ފިޔަވަޅުތައް އެޅުމަށް ސަމާލުކަން ދޭންޖެހޭނެ ކަމަށެވެ. އަދި މި ސާކިއުލާގައިވާ ކަންކަމުގެ އިތުރުންވެސް، ހަރަދު ކުޑަކުރުމަށް އެޅެންހުރި އެންމެހާ ފިޔަވަޅުތައް އެޅުމަށް ކުންފުނިތަކުގެ ބޯޑުތަކަށް ވަނީ އަންގާފައެވެ.
