ނިމިދިޔަ އެމްޑީޕީގެ ފަސް އަހަރުގެ ދައުރުގައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ އަދަދު ގާތްގަނޑަކަށް 100 އިންސައްތަ އިތުރުކޮށް، ދައުލަތުގެ ބަޖެޓަށް ނުކަތާވަރަށް ޚަރަދުތައް ބޮޑުކޮށްލާފައިވާކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުގެ (ޕީސީބީ) ތަފާސްހިސާބުތަކުން ދައްކައިފިއެވެ.

މާލީ ވަޒީރު ޒަރީރު ފާހަގަކުރެއްވި ގޮތުގައި، 2018 ވަނަ އަހަރު ކުންފުނިތަކުގައި 18,676 މުވައްޒަފުން ތިބިއިރު، އެމްޑީޕީގެ ވެރިކަން ނިމުނުއިރު 2023 ގެ ނިޔަލަށް މި އަދަދު ވަނީ 36,729 އަށް އުފުލިފައެވެ. ވަކިން ޚާއްޞަކޮށް ރިޔާސީ އިންތިޚާބާ ދިމާކޮށް ސިޔާސީ މަންފާ ހޯދުމުގެ ގޮތުން ކުންފުނިތަކަށް މުވައްޒަފުން ބޯކުރުމުގެ ސަބަބުން، ދައުލަތުގެ ބަޖެޓުން ބޮޑެތި ހޭދަތަކެއް ސަބްސިޑީގެ ގޮތުގައި ކުރަންޖެހި ގައުމުގެ މާލީ ނިޒާމަށް ވަނީ ބާރުބޮޑުވެފައެވެ.

މިގޮތަށް މުވައްޒަފުން އިތުރުކުރުމުގެ އިތުރުން، އޭރުގެ ވެރިކަމުގައި ސަރުކާރު ކުންފުނިތަކުގެ ތެރޭގައި ބޮޑެތި ކޮރަޕްޝަނުގެ އަމަލުތަކާއި މާލީ ނާޖާއިޒު ފައިދާ ހޯދުންތައް ހިންގާފައިވާކަމުގެ ތުހުމަތުތައް ވަނީ ފެންމަތިވެފައެވެ. ވަކިން ޚާއްޞަކޮށް ފެނަކަ ކޯޕަރޭޝަނާއި އާރުޑީސީ ފަދަ ކުންފުނިތަކުން ބޭނުންވާ ވަރަށްވުރެ އިތުރަށް، އެއްވެސް ޕްލޭނެއް ނެތި ސިޔާސީ މަގާމުތައް އުފައްދައި، ކުންފުނިތަކުގެ މާލީ ގާބިލުކަމަށް ނުބަލައި ކުރި ޚަރަދުތަކުގެ ސަބަބުން އެ ތަންތަން ވަނީ ބިލިއަނުން ދަރަނިވެރިވެފައެވެ.

މީގެ އިތުރުން، ޕްރޮކިއުމަންޓް އުސޫލުތަކާ ޚިލާފަށް ގާތް ފަރާތްތަކަށް ބޮޑެތި މަޝްރޫއުތައް ހަވާލުކުރުމާއި، ކުންފުނިތަކުގެ ފައިސާ ނާޖާއިޒު ގޮތުގައި ސިޔާސީ ކެމްޕޭންތަކަށް ބޭނުންކުރުން ފަދަ ކޮރަޕްޝަނުގެ ބޮޑެތި މައްސަލަތައް އޮޑިޓް ރިޕޯޓުތަކުން ވަނީ ފާހަގަކުރެވިފައެވެ.

އެމްޑީޕީގެ ދައުރުގައި ހިންގި މި ބޮޑު އިސްރާފާއި ކޮރަޕްޝަނުގެ ސަބަބުން ބަނގުރޫޓުވުމުގެ މަގުމަތީގައި ހުރި ސަރުކާރު ކުންފުނިތައް ސަލާމަތްކުރުމަށްޓަކައި، މިހާރުގެ ސަރުކާރުން ވަނީ ހަރުދަނާ އިސްލާހީ ފިޔަވަޅުތަކެއް އަޅަން ފަށާފައެވެ. އެގޮތުން ކުންފުނިތަކުގެ ޚަރަދު ކުޑަކުރުމަށާއި، ބޭނުންނުވާ މަގާމުތައް މަދުކޮށް ހިންގުން ހަރުދަނާކުރުމުގެ މަސައްކަތް މިހާރު ދަނީ ކުރަމުންނެވެ. ނަމަވެސް، މާލީ ވަޒީރު ޒަރީރު ވިދާޅުވި ގޮތުގައި، ކުންފުނިތައް އިސްލާހުކުރާއިރުވެސް، މުވައްޒަފެއްގެ ސިޔާސީ ފިކުރަށް ނުވަތަ ފާޅުކުރާ ސިޔާސީ ޚިޔާލަކަށް ބިނާކޮށް މުވައްޒަފުން ވަޒީފާއިން ވަކިކުރުމަކީ މި ސަރުކާރުން ތާއީދުކުރާނެ ކަމެއް ނޫނެވެ.