އިޒްރޭލު ޕާސްޕޯޓުގައި ރާއްޖެ އެތެރެ ނުވެވޭ ގޮތަށް އިމިގްރޭޝަން ޤާނޫނަށް އިޞްލާޙު ގެނައުމަށް ހުށަހަޅާފައިވާ ބިލާ މެދު ގޮތެއް ނިންމުމަށް ރައްޔިތުންގެ މަޖިލީހުގެ 241 ކޮމިޓީން ސުންގަޑިއެއް ކަނޑައަޅައިފިއެވެ.

ކޮމިޓީން ނިންމީ އަންނަ އަހަރުގެ ފެބްރުއަރީ މަހުގެ ނިޔަލަށް މި ބިލާ މެދު ގޮތެއް ނިންމުމަށެވެ. މި ބިލަކީ އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް އަޙްމަދު ނަސީމް ހުށަހެޅުއްވި ބިލެކެވެ.

ކޮމިޓީގެ ބައްދަލުވުމުގައި ވާހަކަދެއްކެވި މެންބަރުން ފާހަގަކުރެއްވި ގޮތުގައި މިއީ ވަރަށް ޙައްސާސް މައްސަލައެކެވެ. އަދި މި ބިލާ ގުޅިގެން ގިނަ ފަރާތްތަކަކާ މަޝްވަރާކުރަން ޖެހޭނެ ކަމަށް ވެސް މެންބަރުން ވިދާޅުވިއެވެ.

ތުޅާދޫ ދާއިރާގެ މެންބަރު ޢަބްދުލް ޣަނީ ޢަބްދުލް ޙަކީމް ވިދާޅުވީ މިއީ އެމްޑީޕީން ސިޔާސީ މަޤްޞަދެއް ޙާޞިލުކުރުމަށް ހުށަހެޅި ބިލެއް ކަމަށެވެ. އައްޑޫ ހުޅުދޫ ދާއިރާގެ މެންބަރު މުޙައްމަދު ޝާހިދު ވިދާޅުވީ މި މައްސަލައަކީ ރާއްޖޭގެ އިޤްތިޞާދާއި މިނިވަންކަމާ ވެސް ގުޅިފައިވާ ކަމެއް ކަމަށާއި، އެހެންކަމުން ސިޔާސީ ނަޒަރަކުން އެކަނި ބަލައިގެން ކުރިއަށް ގެންދެވޭނެ ކަމެއް ނޫން ކަމަށެވެ.

މި ބިލާ ގުޅިގެން ސިޔާސީ ޕާޓީތަކުގެ އިތުރުން އިޤްތިޞާދީ މާހިރުންނާއި އިންވެސްޓަރުންގެ ޚިޔާލު ވެސް ހޯދަން ޖެހޭނެ ކަމަށް ޝާހިދު ވިދާޅުވިއެވެ.

އިޒްރޭލު ޕާސްޕޯޓާ ގުޅޭ ބިލުގެ މަސައްކަތް ލަސްވަމުންދާތީ އެމްޑީޕީން ވަނީ ނުރުހުން ފާޅުކޮށް، މި މައްސަލައިގައި ކުއްލި މައްސަލަތައް ހުށަހަޅައި، ބަޔާންތައް ވެސް ނެރެފައެވެ.