ފަލަސްތީނުގެ މައްސަލައަށް ހައްލެއް ހޯދުމަށް ސައުދީ އަރަބިއްޔާގެ ލީޑަރޝިޕްގެ ދަށުން އިސްލާމީ އުއްމަތުން އެއްބައިވެ މަސައްކަތްކުރަންޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ ސައުދީ އަރަބިއްޔާގެ ވެރިރަށް ރިޔާދުގައި މިއަދު ކުރިއަށްދާ ޖޮއިންޓް އަރަބް-އިސްލާމިކް ސަމިޓުގައި ތަޤުރީރުކުރައްވަމުންނެވެ. މި ސަމިޓަކީ އިސްރާއީލުން ފަލަސްތީނާއި ލުބުނާނަށް ދެމުންދާ ޙަމަލާތަކާއި ސަރަހައްދީ މައްސަލަތަކާ މެދު މަޝްވަރާކުރުމަށް ބޭއްވޭ ބައްދަލުވުމެކެވެ.
ރައީސްގެ ވާހަކަފުޅުގައި، ފަލަސްތީނުގެ މައްސަލައަކީ އެތައް އަހަރެއް ވެފައިވާ މައްސަލައެއްކަމަށާއި، މިދިޔަ އަހަރެއްހާ ދުވަހުގެ ތެރޭގައި އެކަނިވެސް ފަލަސްތީނުގެ ބައި ލައްކައަށްވުރެ ގިނަ ރައްޔިތުން މަރާލާފައިވާކަން ފާހަގަކުރެއްވިއެވެ. އަދި ބާރުވެރި ޤައުމުތަކުން މި މައްސަލައަށް އަޅާނުލާ ތިބުމުން އިސްރާއީލުން އަނިޔާތައް އިތުރަށް ވަރުގަދަކުރަމުންދާކަމަށް ރައީސް ވިދާޅުވިއެވެ.
Advertisement
ރައީސް ވިދާޅުވީ ބައިނަލްއަޤްވާމީ މުޖުތަމަޢުއާއި ނުފޫޒުގަދަ ފަރާތްތަކުން ފަލަސްތީނުގެ ރައްޔިތުން ފެއިލްކޮށްލާފައިވާ ކަމަށެވެ. އަދި އދ ގައި ފަލަސްތީނުގެ ހައްޤުގައި ކުރާ މަސައްކަތްތަކަށްވެސް ވީޓޯގެ ބާރު ބޭނުންކޮށްގެން ހުރަސް އަޅަމުންދާކަން ރައީސް ފާހަގަކުރެއްވިއެވެ.
ރައީސް އިތުރަށް ވިދާޅުވީ ފަލަސްތީނުގެ ދައުލަތް ދުނިޔޭގެ ގިނަ ޤައުމުތަކުން ބަލައިގެންފައިވާ ކަމަށާއި، ނަމަވެސް ބައިނަލްއަޤްވާމީ މުޖުތަމަޢިން އެކަމަށް ސިޔާސީ އަދި މާލީ އެހީތެރިކަން ފޯރުކޮށްދޭންޖެހޭ ކަމަށެވެ. އަދި ރާއްޖެއިންވެސް ފަލަސްތީނުގެ ރައްޔިތުންގެ ހައްޤުގައި މަސައްކަތްތަކެއް ކުރަމުންދާކަން ރައީސް ފާހަގަކުރެއްވިއެވެ.
