ސަރުކާރުން ރަށްރަށުގައި ޤާއިމްކުރާ އައިސްޕްލާންޓްތަކުގެ މަސައްކަތް ދެއަހަރު ތެރޭ ނިންމޭނެ ކަމަށް ފިޝަރީސް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމްގައި ވާހަކަ ދައްކަވަމުން މިނިސްޓަރ ޝިޔާމް ވިދާޅުވީ މި ސަރުކާރުން ވެރިކަމާއި ހަވާލުވިއިރު މިފްކޯގެ އައިސްޕްލާންޓްތައް ވަނީ ފެނަކައާއި ހަވާލުކޮށްފައިވާ ކަމަށާއި، އެ އައިއސްޕްލާންޓްތައް ހިންގުމުގެ ހަކަތެއް ފެނަކައިގައި ނެތް ކަމަށެވެ. އަދި މިކަމާ ގުޅިގެން ގިނަ އައިސް ޕްލާންޓްތަކުގެ އޮޕަރޭޝަން ހުރީ ހުއްޓިފައިކަމަށާއި، މި ސަރުކާރުން އައިސް މި އައިސްޕްލާންޓްތައް އަލުން އޮޕަރޭޝަނަށް ގެނެސްފައިވާ ކަމަށް މިނިސްޓަރ ވިދާޅުވިއެވެ.

މީގެ އިތުރުން ފެނަކައަށް ތަރައްޤީކުރަން ހަވާލުކޮށްފައިވާ 17 އައިސްޕްލާންޓެއްގެ މަސައްކަތްވެސް ހުރީ ކުރިއަށް ނުގެންގޮސް ކަމަށް މިނިސްޓަރު ވިދާޅުވިއެވެ. އަދި މި ސަރުކާރުން ވެރިކަމަށް އައިސް އަލުން އައިސްޕްލާންޓް އެޅުމުގެ މަސައްކަތް ކުރަމުން އަންނަ ކަމަށް މިނިސްޓަރ ވިދާޅުވިއެވެ. އެގޮތުން މިހާރުވެސް 4 އައިސްޕްލާންޓެއްގެ މަސައްކަތް ކުރަމުން އަންނަ ކަމަށާއި، އިތުރު 5 އައިސްޕްލާންޓެއްގެ މަސައްކަތް އަންނަ އަހަރު ތެރޭ ފެށުމަށް ބިޑަށް ހުޅުވާލާފައިވާ ކަމަށް މިނިސްޓަރ ވިދާޅުވިއެވެ. އަދި މި ސަރުކާރުގެ ދެ އަހަރުގެ ތެރޭ ސަރުކާރުން އަޅަން ކަނޑައަޅާފައިވާ ހުރި އައިސްޕްލާންޓްތަކެއްގެ މަސައްކަތް ނިންމާލާނެ ކަމަށް މިނިސްޓަރ ވިދާޅުވިއެވެ.

މަސްވެރިންނަށް އައިސް ލިބުމުގައި ހުރި ދަތިކަމުގެ ވާހަކައަކީ އަބަދުވެސް މަސްވެރިން ފާހަގަ ކުރަމުން އަންނަ މައްސަލައެކެވެ. އަދި މި މައްސަލަ އަށް ދާއިމީ ހައްލެއް ގެނައުމަށް މި ސަރުކާރުން އަންނަނީ ގިނަގުނަ މަސައްކަތްތަކެއް ކުރަމުންނެވެ.