ރާއްޖޭގެ ރަށްރަށުގައި މަސްތުވާތަކެތި ބޭނުންކުރާ މީހުންނަށް ފަރުވާ ދެވޭނެ ނިޒާމެއް ޤާއިމުކުރުމުގެ މަސައްކަތް ކުރަމުންދާ ކަމަށް ނެޝަނަލް ޑްރަގް އެޖެންސީ (އެންޑީއޭ) އިން މިއަދު ހާމަކޮށްފިއެވެ.

އެންޑީއޭގެ ޗެއަރޕާސަން ލުބްނާ ޒާހިރު ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ވިދާޅުވީ މި ނިޒާމުގެ ދަށުން ހެލްތު ފެސިލިޓީތައް މެދުވެރިކޮށް އައުޓްޕޭޝަންޓް ޚިދުމަތް ދިނުމަށް ރޭވިފައިވާ ކަމަށެވެ. މިކަމާ ގުޅޭގޮތުން ސިއްޙަތާއި ބެހޭ ވަޒީރާއި ދާޚިލީ ސަލާމަތާއި ފަންނިއްޔާތާ ބެހޭ ވަޒީރާ ބައްދަލުކޮށް މަޝްވަރާކުރެވިފައިވާ ކަމަށާއި، ސިއްޙީ ވުޒާރާއިން މިކަމަށް އެއްބާރުލުން ދޭނެ ކަމަށް ވިދާޅުވެފައިވާކަން ލުބްނާ ވިދާޅުވިއެވެ.

މި ޚިދުމަތް ފުރަތަމަ ފަށާނީ މަސްތުވާތަކެތީގެ މައްސަލަ ބޮޑު ރަށްރަށް ހިމެނޭ އަތޮޅު ހޮސްޕިޓަލްތައް މެދުވެރިކޮށް ކަމަށް ލުބްނާ ވިދާޅުވިއެވެ. އަދި ޑިޓޮކްސިފިކޭޝަނަށް ބޭނުންކުރާ ބޭސް އެންޑީއޭ މެދުވެރިކޮށް ފޯރުކޮށްދެވޭނެ ކަމަށްވެސް ލުބްނާ ވިދާޅުވިއެވެ.

މީގެ އިތުރުން، ބޮޑެތި ހޮސްޕިޓަލްތަކުގައި މެޑިކޭޓަޑް އެސިސްޓަންޓް ޓްރީޓްމަންޓް ފަރުވާތައް ފެށުމަށް ހަމަޖެހިފައިވާ ކަމަށާއި، މި ނިޒާމު ޤާއިމުކުރެވުމުން މަސްތުވާތަކެތި ބޭނުންކުރާ މީހުންނަށް ރަށްރަށުގައި ފަރުވާގެ ފުރުސަތު ޔަޤީންވާނެ ކަމަށް ލުބްނާ ވިދާޅުވިއެވެ.

ފަރުވާއަށް އެއްބާރުލުން ނުދޭ މީހުންނަށް ފިޔަވަޅު އެޅުމަށްވެސް އެންޑީއޭއިން ވަނީ ނިންމާފައެވެ. އަދި ރިހެބިލިޓޭޝަން ސެންޓަރުތަކުގައި ތިބެގެން ފަރުވާ ފޯރުކޮށްދޭ މީހުންވެސް އެއްބާރުލުން ނުދޭނަމަ ފިޔަވަޅު އަޅާނެ ކަމަށް ލުބްނާ ވިދާޅުވިއެވެ.

މީގެ އިތުރުން މަސްތުވާތަކެތީގެ ހާލަތު ދެނެގަތުމުގެ ދިރާސާއެއް ރާއްޖޭގައި ކުރިއަށް ގެންދިޔުމަށް ސަރުކާރުން ނިންމާފައިވާކަންވެސް ފާހަގަކޮށްލެވެއެވެ.

ރާއްޖޭގައި އެންމެ ފަހުން ނެޝަނަލް ޑްރަގް ދިރާސާއެއް ކުރިއަށް ގެންގޮސްފައިވަނީ 2012 ވަނަ އަހަރުއެވެ. ފުލުހުންގެ މަޢުލޫމާތު ދައްކާ ގޮތުގައި ރާއްޖޭގެ ހުރިހާ ރަށެއްގައި ވެސް މަސްތުވާތަކެތީގެ މައްސަލަ އެބައޮތެވެ.

އެންމެ ފަހުގެ ދިރާސާތަކުން ދައްކާ ގޮތުގައި ދިވެހިރާއްޖޭގައި މަސްތުވާތަކެތި ބޭނުންކުރާ 7500 ވަރަކަށް މީހުން އުޅެއެވެ. މި އަދަދަކީ ރާއްޖޭގެ އާބާދީއަށް ބަލާއިރު ކަންބޮޑުވާންޖެހޭ އަދަދެކެވެ.