ޔޫއެފާ ނޭޝަންސް ލީގުގައި ބުރާސްފަތި ދުވަހު ފްރާންސް އާއި އިސްރާއީލާ ދެމެދު ކުޅޭ މެޗަށް އިސްރާއީލްގެ ޔަހުދީންގެ ސަލާމަތްކަން ޔަޤީންކުރުމަށް ފްރާންސް ސަރުކާރުން 4,000 ފުލުހުން ނެރޭނެ ކަމަށް ފްރާންސްގެ މީޑިއާތަކުން ރިޕޯޓުކޮށްފިއެވެ. 

ގްރޫޕް އޭ2 ގެ ދެވަނައިގައިވާ ފްރާންސް އާއި އިސްރާއީލު ބައްދަލުކުރާ މި މެޗު ކުޅޭ ސްޓޭޑް ޑި ފްރާންސް އާއި އޭގެ ވަށައިގެންވާ ސަރަޙައްދުގައި 2,600 އަށްވުރެ ގިނަ ފުލުހުންނާއި ޖަންދާމުން ޑިއުޓީގައި ތިބޭނެ ކަމަށް ބެލެވެއެވެ. ޖަންދާމުންނަކީ ހަތިޔާރު އެޅި ސިފައިންނެވެ. މީގެ އިތުރުން ސިވިލް ހެދުމުގައި ތިބޭ ފުލުހުން ސްޓޭޑިއަމްގެ ގޮނޑިތަކުގައިވެސް ތިބޭނެ ކަމަށް ފުރާންސްގެ އިންޓީރިއަރ މިނިސްޓަރ ބުރޫނޯ ރެޓެއިލޯ ވިދާޅުވެއެވެ.

ޕެރިސްގެ އުތުރު ސަރަޙައްދު ސެއިންޓް-ޑެނިސްގައި ހުންނަ ސްޓޭޑް ޑި ފްރާންސް އަކީ 81,000 މީހުންގެ ޖާގަ އޮންނަ ފްރާންސްގެ އެންމެ ބޮޑު ސްޓޭޑިއަމެވެ.

ފްރާންސްގެ ރަޔަޓް ޕޮލިސް ކަމަށްވާ ސީއާރްއެސް (ރިޕަބްލިކަން ސެކިއުރިޓީ ކޯޕްސް) ވެސް ޕެރިސް ސިޓީގެ އެކި ސަރަޙައްދުތަކުގައި ހަރަކާތްތެރިވާނެ ކަމަށް ރިޕޯޓުތައް ބުނެއެވެ.

އިސްރާއީލު ޓީމުގެ ރައްކާތެރިކަމަށްޓަކައި ޕެރިސް އާއި ސެއިންޓް-ޑެނިސް އަށް ޖުމުލަ 4,000 ފުލުހުން ނެރޭނެއެވެ. އަދި އިސްރާއީލު ޓީމު ތިބޭ ހޮޓަލުގައިވެސް ފުލުހުން ބަލަހައްޓާނެއެވެ.

ބައެއް ޚަބަރުތައް ބުނާ ގޮތުގައި ފީފާގެ އެންގުމަށް ފުރާސުން ވަނީ ވަރަށް ރަނގަޅަށް ސެކިއުރިޓީގެ އިންތިޒާމް ކަށަވަރު ކުރާނެ ކަމަށް ބުނެފައެވެ. އެގޮތުން މެޗު ކުޅޭއިރު ދަނޑުގެ އެންމެ ކައިރީގައިވާ ގޮނޑިތައް ބަހައްޓާނީ ހުސްކޮށެވެ. މިއީ ދަނޑަށް މީހުން ވަދެ އިސްރާއީލްގެ ޔަހޫދީ އަކަށް ގޯނާވެދާނެތީ އެކަމުން ސަލާމަތްކުރުމަށް އަޅާ ފިޔަވަޅެކެވެ.

ފްރާންސް އާއި އިސްރާއީލުގެ މެޗު އެހެން ތަނަކަށް ބަދަލުކުރުމަށްވެސް ބައެއް ފަރާތްތަކުން ދަނީ ގޮވާލަމުންނެވެ. އެގޮތަށް ގޮވާލާ ފަރާތްތަކަށް ރައްދު ދެމުން، ފްރާންސްގެ އިންޓީރިއަ މިނިސްޓަރ ވިދާޅުވީ، މެޗު ކުޅެންޖެހޭނީ ފުރާންސުގައި ކަމަށާއި ކުޅުތެރިންގެ ރައްކާތެރިކަން ކަށަވަރުވާނެ ކަމަށެވެ. އޭނާގެ އެދުމުގެ މަތިން ޕެރިސް ޕޮލިސް ޗީފް ލޯރަންޓް ނުނެޒް ވަނީ ސަލާމަތީ ފިޔަވަޅުތައް އަޅާފައި ކަމަށްވެސް ވިދާޅުވިއެވެ.

މި މެޗު ކުޅޭނީ ބުރާސްފަތި ދުވަހުގެރޭ ރާއްޖޭގެ ގަޑިން 12:45 ގައެވެ. މިމެޗުގައި އެމްބާޕޭ ނުކުޅޭއިރު އެންމެފަހުން ކުޅުނު 3 މެޗުވެސް ފުރާންސު ވަނީ މޮޅުވެފައެވެ. ފުރާންސް ބަލިވީ ހަމައެކަނި އިޓަލީ އަތުންނެވެ. ފުރާންސަށް ހަތަރު މެޗުން 9 ޕޮއިންޓު ލިބިފައިވާއިރު 4 މެޗުން އިސްރާއީލަށް ލިބިފައިވަނީ 0 ޕޮއިންޓެވެ.