ރާއްޖޭގައި މެރިކަލްޗަރ ސިނާޢަތް ތަރައްޤީކުރުމަށް ސަރުކާރުން 4 ސަރަޙައްދެއް ކަނޑައަޅުއްވައިފިއެވެ. މިކަން ހާމަކުރެއްވީ ބޭސިކް މެރިކަލްޗަރ ކޯހުގެ ދެވަނަ ބެޗް ނިންމުމުގެ ރަސްމިއްޔާތުގައި މަސްވެރިކަމާ ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމެވެ.

ވަޒީރު ވިދާޅުވީ މެރިކަލްޗަރ ސިނާޢަތް ވަކި ސިނާޢަތެއްގެ ގޮތުގައި ތަރައްޤީކުރެވޭނެކަމުގެ ޔަގީންކަން އޮތްކަމަށެވެ. މިގޮތުން ވަޒީރުންގެ މަޖިލީހުން ކަނޑައަޅުއްވާފައިވާ 4 ސަރަޙައްދަކީ ބޮޑު ތިލަދުންމަތި، ރ. އަތޮޅު، މ. އަތޮޅު އަދި ތ. އަތޮޅެވެ. މީގެ އިތުރުން މަނިޔަފުށީގެ ކައިރީގައިވާ ފަޅެއްވެސް މިކަމަށް ކަނޑައަޅާފައިވެއެވެ.

މި ސަރަޙައްދުތަކުގައި މެރިކަލްޗަރގެ މަސައްކަތް ކުރުމަށް ބޭނުންވާ ޤަވާޢިދުތައް އެކުލަވާލުމުގެ މަސައްކަތް މިހާރު ކުރިއަށްދާ ކަމަށް ވަޒީރު ވިދާޅުވިއެވެ. އަދި މިކަމަކީ ރާއްޖޭގައި ކުރެވޭނެ ކަމެއްކަން އިންވެސްޓަރުންނަށާއި ދިވެހިންނަށް ދައްކަން ޖެހޭނެކަމަށާއި، މިއީ އާމްދަނީ ލިބޭ ވަރުގަދަ ސިނާޢަތަކަށް ވެގެންދާނެކަމުގެ ޔަގީންކަން އޮތްކަމަށް ވިދާޅުވިއެވެ.

މި މަސައްކަތް ކުރުމަށް ސަރުކާރުން ބޮޑެތި ލުއިތަކެއް ދޭން ނިންމާފައިވެއެވެ. އެގޮތުން ކަނޑައެޅިފައިވާ ސަރަޙައްދުތަކުން ބިން ނެގުމަށް ފައިސާ ނުނަގާ ގޮތަށާއި، ފުރަތަމަ 3 އަހަރު ބިމު ކުލި ނުނެގުމަށް ނިންމާފައިވެއެވެ. އަދި މި މަސައްކަތަށް ބޭނުންވާ ވަޞީލަތްތައް ރާއްޖެ އެތެރެކުރުމަށް ޑިއުޓީ މާފުކުރުމަށް ވެސް ސަރުކާރުން ވަނީ ނިންމާފައެވެ.

ވޯލްޑް ބޭންކްގެ އެހީގައި މޯލްޑިވްސް މެރިން ރިސަރޗް ސެންޓަރުން ހިންގި ބޭސިކް މެރިކަލްޗަރ ކޯހުގެ ދެވަނަ ބެޗްގައި 16 ފަރާތަކުން ބައިވެރިވިއެވެ. މި ޕްރޮގްރާމްގެ މަޤްޞަދަކީ ރާއްޖޭގައި މެރިކަލްޗަރ ސިނާޢަތުގައި މަސައްކަތްކުރާނެ ދިވެހިން ތަމްރީނުކުރުމެވެ. މިހާތަނަށް މި ކޯހުގެދަށުން 26 ފަރާތެއް ވަނީ ތަމްރީނުކޮށްފައެވެ.

މި ކޯހުގައި އެކުއަކަލްޗަރގެ ނިޒާމުތަކާއި، ދިރޭ ކާނާ އާލާކުރުމާއި، ފާނައާއި ހުއިފިލަނޑާ އަދި ދިވެހި މާކަނޑުމަހާއި އިތާމުތް އާލާކުރުމާ ބެހޭ މަޢުލޫމާތު ދީފައިވެއެވެ. މީގެ އިތުރުން އާލާކުރާ ބާވަތްތަކަށް ޖެހޭ ބަލިތައް ދެނެގަނެ، އެ ބަލިތަކުން ރައްކާތެރިވުމުގެ ގޮތްތަކާއި، މެރިކަލްޗަރ އާލާކުރުމުގައި ތިމާވެއްޓަށް ގެއްލުން ކުޑަވާނެ ގޮތްތަކާ ބެހޭ މަޢުލޫމާތުވެސް ދީފައިވެއެވެ.