ޗައިނާ ސަރުކާރުގެ އިސްނެގުމުގެ މަތިން ރާއްޖެއަށް ޒިޔާރަތްކުރި ލޮލުގެ ޑޮކްޓަރުންގެ ޓީމުން ވޭތުވެދިޔަ 3 ދުވަހުގެ ތެރޭގައި 60 އެއްހާ ސާޖަރީ ހަދައިފިއެވެ. މި ކޭމްޕް ކުރިއަށްދަނީ ހުޅުމާލެ ހޮސްޕިޓަލުގައެވެ.
ހުޅުމާލެ ހޮސްޕިޓަލުގައި މި ކޭމްޕް ކުރިއަށްދާ ގޮތް ބެއްލެވުމަށާއި ފަރުވާ ހޯދާ މީހުންނާ ބައްދަލުކުރެއްވުމަށް ސިއްޙަތާބެހޭ ވަޒީރު ޢަބްދުﷲ ނާޒިމް ވަނީ ހޮސްޕިޓަލަށް ޒިޔާރަތްކުރައްވާފައެވެ. މި ޒިޔާރަތުގައި ޗައިނާގެ އެމްބެސެޑަރ ވާން ލިޖިންގެ އިތުރުން ދަރުމަވަންތަ ހޮސްޕިޓަލްގެ ސީއީއޯ އިބްރާހީމް ޢަބްދުއްރައްޒާޤު ޙަލީމްވެސް ބައިވެރިވެވަޑައިގެންނެވިއެވެ.
ޗައިނާގެ އެމްބެސެޑަރ ވާން ލިޖިން ވިދާޅުވީ ވޭތުވެދިޔަ ތިން ދުވަހުގެ ތެރޭ ޗައިނާގެ ޓީމުން 60 އެއްހާ ސާޖަރީ ހަދައި، ދިވެހިންނަށް ފަރުވާ ދީފައިވާ ކަމަށެވެ. އަދި ރާއްޖެއާއި ޗައިނާގެ ގުޅުމުގެ ސަބަބުން ދިވެހި ރައްޔިތުންނަށް ފައިދާތަކެއްވާތީ އުފާކުރައްވާ ކަމަށްވެސް އޭނާ ވިދާޅުވިއެވެ.
Advertisement
މި އައި ކޭމްޕުގައި ލޮލުގެ އެކި ބަލިތަކަށް ފަރުވާ ދިނުމުގެ އިތުރުން ލެންސު ނުސާފުވެފައިވާ މީހުންނަށް ޚާއްޞަ ސާޖަރީތަކެއް ހެދުމުގެ ޚިދުމަތްވެސް އަންނަނީ ދެމުންނެވެ. 2016 އިން ފެށިގެން ސިލްސިލާ ގޮތެއްގައި ކުރިއަށްގެންދާ މި އައި ކޭމްޕުގެ މިފަހަރުގެ ޙަރަކާތް ފެށީ މި މަހުގެ 5 ވަނަ ދުވަހުއެވެ. ވޭތުވެދިޔަ އަހަރުތަކުގައި މި ކޭމްޕުތައް މެދުވެރިކޮށް 5،000 އަށްވުރެ ގިނަ މީހުންނަށް ފަރުވާދީ 600 އަށްވުރެ ގިނަ މީހުންގެ ލޮލުގެ ސާޖަރީ ހަދާފައިވެއެވެ.
ޗައިނާގެ ޑޮކްޓަރުންގެ ޚާއްސަ ޓީމެއް ރާއްޖޭގައި ހަރަކާތްތެރިވަމުން އަންނައިރު، 2020 ވަނަ އަހަރު ވަނީ ހުޅުމާލެ ހޮސްޕިޓަލުގައި ޗައިނާ ސަރުކާރުގެ އެހީގައި ކްލިނިކްއެއް ޤާއިމްކޮށްފައިކަން ފާހަގަ ކުރެވެއެވެ.
