މަސްވެރިންގެ ޤައުމީ ދަފްތަރުގައި މިހާތަނަށް 80 އިންސައްތަ އުޅަނދު ރަޖިސްޓްރީ ކޮށްފައިވާކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

މަސްވެރިންގެ ޤައުމީ ދަފްތަރު އެކުލަވާލުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މި ދަފްތަރު އެކުލަވާލުމުގެ މައިގަނޑު މަޤްޞަދަކީ މަސްވެރިކަމަކީ ދައުލަތުން ބަލައިގަންނަ ޢާމްދަނީ ލިބޭ މަސައްކަތެއްގެ ގޮތުގައި ކަނޑައެޅުމެވެ.

މިއަހަރުގެ ފެބްރުއަރީ 16 ވަނަ ދުވަހު އިފްތިތާޙުކުރެވުނު މި ދަފްތަރުގެ މައިގަނޑު ބޭނުމަކީ މަސްވެރިންނަށް މާލީ ވަޞީލަތްތަކުގެ ފައިދާ ލިބިގަތުމަށް ހުރި ހުރަސްތައް ނައްތާލައި، މަސްވެރިކަމަކީ ރާއްޖޭގައި ރަސްމީކޮށް ބަލައިގަންނަ ވަޒީފާއަކަށް ހެދުމެވެ.

ވަޒީރު ޝިޔާމް ވިދާޅުވި ގޮތުގައި، މި ދަފްތަރު އެކުލަވާލުމަށް އެ ވުޒާރާގެ 30 އަށްވުރެ ގިނަ މުވައްޒަފުން ރާއްޖޭގެ 15 އަތޮޅަކަށް ދަތުރުކޮށްފައިވެއެވެ. މިހާތަނަށް 350 އުޅަނދު ދަފްތަރުކުރެވިފައިވާ ކަމަށާއި، މިއީ ޖުމްލަ 460 ނުވަތަ 470 އުޅަނދުގެ ތެރެއިން ކަމަށް ވަޒީރު ފާހަގަކުރެއްވިއެވެ. މީގެ އިތުރުން، 2,100 އަށްވުރެ ގިނަ ފަޅުވެރިން ރަޖިސްޓްރީކުރެވިފައިވާ ކަމަށްވެސް ވަޒީރު ވިދާޅުވިއެވެ.

ވަޒީރު ވަނީ ރާއްޖޭގެ މަސްދޯނިފަހަރުގެ ހުރިހާ އޮޑިވެރިންނަށް އެ ދޯނިފަހަރު ދަފްތަރުކުރުމަށް ގޮވާލައްވާފައެވެ. އަދި މި ސަރުކާރުގެ ވަޢުދާއި އެއްގޮތަށް، ފާނައިގެ މަސްވެރިކަން ފަދަ ފަރުމަސްވެރިކަމުގެ ބާވަތްތަކާއި ރެކްރިއޭޝަނަލް ފިޝިންގ އަދި ސްޕޯޓްސް ފިޝިންގ ފަދަ ޙަރަކާތްތަކުގެ މަޢުލޫމާތުވެސް ފުރިހަމަ ގޮތެއްގައި ނެގޭނެ އިންތިޒާމު ހަމަޖައްސަވާނެ ކަމަށް މަސްވެރިކަމާބެހޭ ވުޒާރާއިން ވަނީ ވިދާޅުވެފައެވެ.